2018 Fifa World Cup-a France cham-pion-puitu defender Raphael Varane chuan international football a chawlhsan thu Ningani khan a Instagram account kaltlanga puangin, Paris Saint-Germain forward Kylian Mbappe chu France national team captain nihna pek a ni dawn niin media lamin an tarlang.
-- Advertisement --
Manchester United centre-back Varane hi tunah kum 29 mi ni ve tawhin, kum 2013 khan Les Blues tan a khel tan a, a chawlh thlengin ram tan game 93-ah goal nga a tilut tling.
Russia rama 2018 World Cup final a khelh bakah 2022 World Cup final-ah Argentina hmachhawn lehin, penalty shoot out-a South American team an hneh loh kha ram tana a inlan tawpna a ni dawn ta a ni.
Varane chuan thangkhat lian zet ram tana a inlan thei kha a hringnuna chawi-mawina ropuiberte zinga pakhat a nih thu sawi chungin special blue jersey tia a sawi a inbel apiangin a inchhuang Iarh thin tih a sawi a, tun hi ram tana inkhelh bansan hun dik tak nia a ngaih thu a tarlang tel.
August 2021-a Real Madrid chhuah-sana United zawm Varane hi Les Bleus player zingah nikum World Cup zawh hnua international football chawlhsan tharlam ber niin, January thla khan Tottenham goalkeeper leh captain ni bawk Hugo Lloris pawhin France kutkawr a lo hlip ve tawh a ni.
France coach Didier Deschamps pawhin a defender thutlukna siam chu a zah thu sawi chungin national team tan erawh hlohna lian a nih thu a tarlang tel.
2022 FIFA World Cup zawh hnu lawka Spurs keeper Lloris-a’n ram tana inkhelh a bansan hnu khan Varane hi France captain thar tura beisei a nih laiin ani pawhin international duty a chawlhsan ve leh ta si a, Karim Benzema lahin ram tana inkhelh chawlhsan a sawiri ve tawh bawk nen Les Blues captain thar tur tunge ni ta ang tia inrinsiakna a kal mek laiin tun dinhmunah Mbappe a rinawm ta ber a, FIFA World Cup final vawihnih khel tawh PSG forward hian kum 24 mi lek ni chungin captain armband a hren ngei a rinawm ta ber niin French Football News chuan a tarlang.
PSG striker hi Nilaini Ligue 1 match-a PSG-in 3-1-a mualneitu Montpellier an hneh tum khan a inhliam a, February ni 14, Thawhlehni Champions League last-16 first leg-a German champion Bayern Munich an mikhual hunah khelmual a lut thei dawn lo a, a hliam endik a nih hnuah chawlhkar thum tal a chawlh a ngai dawn tih nemngheh a ni.
Mbappe hian Montpellier game-ah khan penalty vawihnih thelhin, a goal thun ngei tura ngaih pakhat a hloh bawk a, minute 21-na lekah hliam avanga lakchhuah a ni.
France forward hian February ni 8 French Cup-a Marseille an tum hunah leh nithum hnu Ligue 1 game-a Monaco an sut hunah a inlan thei dawn lo bawk ang.
Season kal laiah Mbappe hian inelna hrang hrang game 26-ah a club tan goal 25 a thun tling tawh.