VC term pawhtawi a nih vangin High Court-ah AMVCA kal tum

Mizoram sawrkarin village council term a pawh tawi duh loin VC Association chu High Court-ah a zualko dawn.Thawhlehni khan Aizawlah All Mizoram Village Council Association (AMVCA) hian general conference an hmang a. Local Adminstration minister C Lalsawivunga’n a hmanpui. Aizawl City Local Council Association leh Lunglei Local Council Association aiawhten an telpui bawk.
VC member kalkhawm hian resolution an pass a. ‘Kan ram, kan hnam leh khawtlang hmawsawnna turin theihtawp chhuah zel turin kan inpeih reng a. Tualchhung rorelna tha leh ngelnghet a awm theihnan kan bei zel ang. Village council zahawmna leh ropuina palzut hi engtikah mah rem kan ti ngai dawn loa, kan hnunga VC lo la ni leh zel turte tan pawh village council ngelnghet leh rintlak siam turin theihtawp kan chhuah zel dawn,’ tih a ni.
The Aizawl Post-in a zawhnaah AMVCA president K Lalngaizuala chuan VC term pawitawi chungchangah hian High Court-a kal an remti a. Court kalna senso atan VC tinin Rs.500 theuh tawh nise, an ti tih a sawi. “Kan ukil rawih turte nen kan sawiho nghal dawn a, Court kal tumnaah hian VC-te kan inlungrual hle,” a ti.
Zawhna chhangin AMVCA president chuan, tuna VC inkhawmpuiah hian Autonomous District Council hnuaia VC-te pawh an tel tha hle a, Court kalna senso thawh kawngah an phurin a ni la la hian an thawh nghal teuh tih a sawi a ni.
VC term pawh tawi hrim hrim emaw a pawt tawitu sawrkar dinglai do tum vang hrim hrim lam niloin, VC dinhmun derthawng lutuk anga lang thei chu humhim a ngai tih chu VC member tam tak ngaihdan a ni tih K Lalngaizuala hian The Aizawl Post a lo hrilh tawh. “Democracy ram kan ni a, ZPM sawrkar a nih vang lam niloin, eng party pawh sawrkar se, chumite sawrkar pawhin an tih kha, tia nakin zela VC dinhmun nghet lo deuha dah theih kha a tha lo thei a ni,” tiin, hemi chungchang thu rel tura an dah chhan hi a lo sawi tawh a ni.