Venezeula lirnghingah mi 1,400 chuang thi awm tawh

Venezuela-ah lirnghing na takin a zawna vawi hnih a sawi hnuah ni thum a liam ta a, chhanchhuah hna thawktute chu an hmanhmawh tawh hle a, mi 1,430 vel an thi finfiah tawh niin mi 51,000 chuang chin hriat lohvin an la awm.
Nilainia lirnghing hi nine-point Richter scale-ah magnitude 7.2 leh 7.5-a na a ni a, La Guaira chhehvela tuipui kamte a tichhe nasa hle.
Thuneitute chuan lirthei tak avanga mi zawn hna a buai deuh avangin Zirtawpni zan atang khan he hmuna luh khap tumin hma an la tan.
Sorkar chhanchhuaktu team an tlem avangin Venezuelan-te chu harsatna thlen nasatna hmunah an beidawng tan a, kut lawngin an hai a. Tanpuitute chuan darkar 72 a liam leh chuan dama lak chhuah theihte tan kawng a ping tawh dawn niin an sawi.
Thuneitute chuan La Guaira chhehvela luh duh tan phalna an dil a ngai dawn tih an sawi a, tute nge luh phalsak tur tih erawh an sawi lo.
Thuneituten theihtawp an chhuah chungin mite chuan harsatna thlen nasatna ber hmunah sorkar team tlem tê chauh hmuh tur an awm tih an sawi.
National Assembly President Jorge Rodriguez chuan, “Mi dam an la awm hi mak tak a ni a. He thil rapthlak takzia hi thup sen a ni lo,” a ti.
Sorkar hnathawkten La Guaira-a dam chhuakte hnenah ei leh in tur an sem a, president lailawk, Delcy Rodriguez-i chuan a sorkar chuan heng ‘chhanchhuahte hun khirh takah hian’ an tan a ding tlat tih a sawi.
Ram dang mite hnen atanga puihna an dawnah lawm thu a sawi a. La Guaira chu ‘sipai chetna’ hmun a a nih thu leh tanpuina tam zawk a awm thu a sawi a, mipuite erawh chuan an mamawh zinga tlem chauh niin an sawi.
Vice president hlui, Rodriguez-i hian January thlaa US-in a khatih hun laia president, Nicolas Maduro-a mana a bân hnuah a hna hi a chelh tan a ni.
Venezuela hian kum sawm chuang zet chu eibarah harsatna a tawk tawh a, mi tam tak chuan Rodriguez-i’n tuna a chanvo a chelh hi an duh lo.
Inrinni khan UN Development Programme chuan lirnghing vanga chhia hlut zawng hi dollar tluklehdingawn 4.7 atanga tluklehdingawn 8.7 inkar vel a nih theih thu an sawi.
Hetihlai hian Inrinni khan Aragua state-ah magnitude 4.8-a na lirnghing a thleng leh niin European-Mediterranean Seismological Centre chuan a tar lang a, chhiatna lian tham a thleng lo thung.
Thi zat hi a pun zel rin a ni a, phone signal awm loh vanga inbiakpawhna a tha lo va, hei vang hian thi leh hliam zat pawh hi chiang taka hriat a harsa rih.
International Organization for Migration (IOM) chuan mi maktaduai 6.76 velin an tuar thei tih a sawi a, heng zinga maktaduai hnih vel hi an khawpui, Caracas-ah bik chauh a ni.
Venezuelan thuneitute chuan Inrinni thleng khan ram dang chhanchhuah hna thawktu pawl member 1,600 zet an ramah pui turin an thleng tawh tih an sawi.
Hetihlai hian US thuneitu pakhat chuan Inrinni khan thuthar thehdarhtute a kawmnaah Simon Bolivar International Airport-a tlankawng chhia chu siam that a nih thu a sawi a, hei vang hian puihna thleng leh sem darh a awlsam phah thei dawn tih a sawi.