Venhimnaa inremna lian ber tur, Rafale 114 leina tur khel mek

Venhimnaa inremna lian ber tur,
Rafale 114 leina tur khel mek
Ram venhimna thila indawrna lian ber tling turin Indian defence ministry chuan Rs. vaibelchhe nuai 3.25 vela France atanga Rafale indo thlawhna 114 leina tur an sawiho mek niin news agency ANI chuan a tar lang a. Tun kar chhung hian ministry thutkhawm hi neih a ni leh dawn bawk niin an sawi.
Indo thlawhna leina tura rawtna awm hi pawm a nih chuan India-in ram venhimna thila inremna a siam lian ber ani dawn a, sipaiten Rafale thlawhna hi 176 an nei tawh dawn tihna a ni bawk a. Air force hian 36 an nei sa mek a; Navy hman tur nikum khan 26 lei turin an ti fel bawk.
Ram venhimna kawnga hotu sangin news agency hnenah rawtna awm mek chungchang hi a sawi a. Inremna siam turah hian Indian Air Force (IAF) hman tur Rafale thlawhna 12-18 peih sa, thlawk mai thei tawh leina tur pawh a tel niin a sawi.
Ruahman dan chuan thlawhna tam zawk hi India-a siam tur niin 30% vel ram chhunga siam turin niin rawt a ni.
US leh Russia ten IAF hman turin F-35 leh Su-57 indo thlawhna tela an fifth-generation fighter lei turin India hi dawr ve ve mah se Delhi hian France a hawi zawk nia sawi a ni.
Rawtna awm mekah hian thlawhna lei tura ram chhunga siam thil 30% vel tel tura tih niin ‘Make in India’ inremna a awm theih nan 50-60% vel thlen a ni tawh tih an sawi.
India hian France hnenah hian thlawhnaah Indian ralthuam leh ama kutchhuak telh ve rawtna hi sorkar leh sorka indawrnaa inremnaa telh ve turin a rawt niin ANI chuan a tar lang a. French lam hian an ngaihdan an la sawi lo niin a tar lang bawk
“IAF-in Rafale indo thlawhna 114 lei a rawtna, Statement of Case (SoC) hi thla tam vak lo liam ta khan defence ministry chuan a dawng tawh a. Ministry hian a pawm hunah Cabinet Committee on Security-in thutawp siam turin a thlir veleh dawn a ni,” tiin ANI chuan an thu dawn an tar lang.
Rafale hi Pakistan laka Operation Sindoor thlakah khan a che tha hle a, Chinese PL-15-in Spectra Electronic Warfare suite a hman lakah boruak atanga boruaka mi vek missile-a kahah a chungnung zawkah a tang a. Hei hian French indo thlawhna hi tam zawk neih duhna a hring a ni.
French company pawhin Hyderabad-ah Rafale thlawhnain a hman, M-88 khawlpui enkawl, siam leh tul dang khawih theihna tur hmun bul a tum mek a. Dassault hian indo thlawhna enkawlna tur hmun chu a siam vel tawh a. Indian aerospace firm zingah Tata pawh a siamnaa inhnamhnawih tura rin a ni tih ANI chuan a tar lang bawk.
India hian a chhehvel nena inkar boruak avangin indo thlawhna hi hmanhmawh takin a mamawh a. IAF hian Su-30 MKI, Rafale leh tual chhunga siamte neih a tum a. LCA Mark 1A 180 siamna turin hma a la mek a, tual chhuak fifth-generation fighter-te hi kum 2035 hnu lamah chauh peih a nih erawh a rinawm.