Vladimir Putin hma lam hun zel tur eng nge ni?

Kum thum kalta khan Russian state TV chuan constitution thlak danglam tumnaa Vladimir Putin-an kum 16 dang thuneihna a chan zui belh theihna tur chu thlawp turin ngenna a siam a.
Mipui nawlpui te hneh an nih theih nan news anchor chuan President Putin chu tuipuia lawng captain, Russian lawng khawvela buaina tuipui zangkhauh taka Russia him taka kaltlangpuitu angin a chhuah a ni.
“Russia hi ngelnghehna oasis a ni a, lawngchawlhna hmun him a ni,” tia sawiin news anchor chuan, “Putin awm lo ta se, kan chungah eng nge thleng ang le?” a ti zui.
24 Feb 2022 a nih meuh chuan Kremlin captain chuan ama siamchawp thlipui hmachhawnin a lawng a khalh a, vur tlang turu tak sut bur tumin chet a la zui a ni.
Vladimir Putin-an Ukraine a runna chuan nunna chan leh tihchhiat a nei ngah hle. A sipai nunna chan tam tak awm tawhin mi thenkhat chuan Ukraine indonaa Russia sipai nunna chante chu sing telah an chhiar tawh.
Russia khua leh tui sang tel tehmeuh te chu sipaia tanluihtirin an awm mek a, chung zingah chuan Russian lung in tang misualte pawh Ukraine do tura chhuah zalena tirhchhuahin an awm. Chutih laiin indona chuan energy leh food price te khawvel huapin a khawih danglam a, European leh global security chu dinhmun derthawngah a chhuah zui zel bawk.
Eng vangin nge Russia president hian indona leh ram lak ngawt chu thlurbingah a neih le?
“Kum 2024-a Russian presidential election awm dawn vang a ni ber” tiin political scientist Ekaterina Schulmann chuan a sawi a.
“He mi hma kum hnih kalta khan Kremlin chuan victorious event awm se a lo duh tawh a. Kum 2022 khan an tum pakhat an hlen tawh a. Kum 2023 khan Russians te chuan an lawng khalhtu captain Putin te ang an nei chuan tuipui fawn karah pawh him taka phur mai ni lovin khawmual hausa zawkah a thlen dawnah an ngai a. Kum 2024-ah vote thlak zui dawnin, eng nge kalsual thei tawh ang le?” tiin a sawi.
Thil tam tak i chhut dik lo emaw beisei anga thil a awm lo a nih chuan a kalsual thei thung. Kremlin chuan a hamsa berin Ukraine run ‘special military operation’ a tih chu kar rei lo tea zawhfel mai theih turah ngaiin Ukraine chu Russian orbit a laklet nghal mai theih turah a ngai a. President Putin chuan Ukraine-in a dodal leh chhanlet theihna leh chakna a neih chu a chhût sual hle a, Khawthlang ram tena Kyiv lungruala an thlawp nasat dan pawh a chhut fuh lo bawk.
Tun thlengin Russian leader chuan Ukraine run chu a chhutsual leh tihsual a ni tih a la pawm duh mai lo va, Putin-an a tum ber chu buaina la kalpui zel a, a tum hlen dan kawng zawn a la ni fan.
Chutah tak chan zawhna pawimawh tak pahnih awmin: Vladimir Putin chuan kum khat hnuah engtiangin nge Ukraine lakah chet lak zel a tum tih chu a ni.
Tunkar tir lama Russian mipuite hnena thusawina a neihah anti-Western lam hlir a sawi a. America leh Nato te chu Ukraine indona awm chhanah puhin Russia chu pawisawi lo angin a chhuah a. Russia leh America-in nuclear arms control treaty an neih chhun New Start chu a hnawl thu a puang a, hengte hian Putin chuan Ukraine chhuahsan emaw Khawthlang ramte nena inngurna chu bansan a tum lo hlea ngaih a ni.
A tuk lawkah Moscow football stadium-ah Ptuin chuan frontline atanga Russian sipai haw te nen hun an hmang a. Awmze nei taka pro-Kremlin rally huaihawt niin Putin chuan mipuite hnenah “Russia historic frontiers-ah indona kalpui mek a ni,” tia sawiin Russia sipai huaisente a fak bawk.
Hengte atanga thil awm dan chhut chuan Kremlin chuan Ukraine atanga inhnuhdawh a tum lo hlea ngaih a ni a, Russian president hrim hrim chu tlawm mai duh tur chi ni lova ngaih a ni bawk.
“Dodaltu an awm lo a nih chuan a kal thui khawp ang,” tiin Andrei Illarionov, President Putin a economic adviser hlui chuan a sawi a. “Military hmang lo chuan Putin chu dan ngaihna a awm lo,” a ti bawk.
“Tute nen pawha inremna siam tura thutho chu a theih alawm,” tia sawiin Andrei Illarionov chuan, “Mahse Putin nena thu duna inremna siam dun thahnem tak kan hmu tawh,” a ti bawk a.
“Putin chuan chung inremna document tin te chu a bawhchhe vek a. Commonwealth of Independence States siamna tur inremna a bawhchhia a, Russia leh Ukraine-in inremna an siam a bawhchhia a, khawvel ram tena Russia leh Ukraine ramri an pawm inremna a bawhchhia a, UN charter a bawhchhia a, Helsenki Act of 1975 a bawhchhia a, Budapest Memorandum a bawk chhe bawk a. A dang pawh a la awm a, document bawhchhiat loh a nei lo,” tiin a sawi.
Russian thuneitute chuan hun rei tak ata pawh an chhuanlam siam ber chu kum 1990 chhova inremna siama Nato in khawchhak lamah inzarpharhna a nei lovang tih chu bawhchhiat a ni an ti fo. Office a luah tirh khan Vladimir Putin chuan Nato chu hmelma angah a ngai lo. Kum 2000 khan Russia ngei pawh chu Nato-a nikhat chu member la ni ve thei turah a ngai. Chumi hnu kum hnih ralah pawh Ukraine-in Nato zawm a tum chungchanga an zawh chu Putin chuan, “Ukraine hi sovereign state a ni a, a security atan a duh duh a zawm thei a lawm,” tiin a sawi a, Ukraine thutlukna siam chuan Moscow leh Kyiv inlaichinna a khawih buai dawn loh thu a lo sawi daih tawh thung.
Mahse kum 2023 vela Putin chu midanglam a ni tawh a. ‘Collective West’ a tih lakah a thinur em em a, kulh hual chunga hruaitu danchep angah inngaiin Russia hmelma te chuan an ram tihchhiat tum angin a ngai bawk. A thusawiah te pawh imperial Russian ruler Peter the Great leh Catherine the Great te a sawi lang fo va, Putin chuan engti kawng emaw takin Russian empire siam chu a tum nia ngaih a ni.
Mahse chu chuan Russia tan eng nge a thlen ang? President Putin chu Russian ngelngheta siamtu anga lar a ni a. Mahse, sipai nuna chan tam, economic hrekna vanga harsatna te chuan chu ngaihdan chu a tidal tial tial a. Indo atangin Russian sang tam takin an ram an chhuahsan tawh a, a tam ber te chu la thalai tak lehkhathiam leh thiamna nei te niin chu brain drain chuan Russia economy nasa zawkin a la tichhe dawn a ni.
Indona thlen hnuah group hrang hrang silai nena inthuam an pung a, private miliatry company heng Yevgeny Prigozhin a Wagner group te leh regional battalion te an awm nuai a. Chung mite leh armed forces te inlaichinna chu a tha lem lo bawk a. Russia Ministry of Defence leh Wagner te inbakkaihna chu langsar tak a ni tawh bawk.
Ngelngheh lohna leh private army inchawhpawlh chu cocktail hlauhawm chungchuang a ni tlat. “Civil war in tun atanga kum sawm chuang chu Russia a tuam ang,” tiin Konstantin Remchukov, Moscow a inbun Nezavisimaya Gazeta newspaper editor chuan a sawi a. “Interest group tun ang huna hausakna sem darh dan theih dan tur hrethiam inti an tam lutuk,” tiin a sawi a.
“Civil war danna kawng awm chhun chu Putin hnuah thuneitu dik leh tha a awm leh awm lohah a innghat ang. Mi pakhat elite te laka thuneihna nei leh huaisen taka hma la ngam a awm a ngai,” tiin Remchukov chuan a sawi bawk.
“Russian elites te chuan Putin thlaktu tur mipa emaw hmeichhia emaw ngaihven an nei em?” tia zawhna pawh Konstantin chuan, “Ngaihven e, an sawiho fo va, a hunah an ngaihdan an la sawi ang a,” a ti a. Chungte chu Putin-an a hriatpui reng em tia zawhna pawh, “Hria e, engkim a hre vek” tiin a chhang bawk.
Tunkar tir lamah erawh Russia parliament lower house speaker chuan parliament-ah, “Putin a awm chhung chuan Russia a awm ang,” a ti mauh thung.
Chu chu a rinawmna a sawina a ni a, thudik tihna a ni lo. Russia chu a dam khawchhuak ngei ang a, kum zabi tam tak a dingchang tawh a. Mahse, Vladimir Putin hma lam hun erawh Ukraine indonain thui tak a hril dawn a ni.