Vur a invurin record siam

Record siam rau rauah pawh hetiang record hi chu a hautak lehzual dawn thin mang e! Damian Kasprzyk, kum 41, chu kekawrte chauh hain vurin a vur a, darkar hnih leh minute 12 leh second 12 chhung vur hian a invur a, a taksa engmah daidangtu awm loa mipa zinga vur a invur rei thei ber record a siam. Record a vur hi snow a invur tih a ni a, ice-a invur record a awm bawk. Snow hi chu van lam atanga vur rawn sur/tla ang hi a ni a, ice chu tui khal a ni ve thung.
He Polish vawt tuarchak zet mai hian tluk loh pakhat a la nei a, chu chu Polish hmeichhia Maria Bodaj a ni. Maria hi chu a hming lemah “Mary Icebreaker” an tih hial a ni a, ani hi khawvela taksa pum vura invur rei thei ber record siam mektu niin, darkar thum leh minute 33 leh second 33 a invur thei.
Damian chuan, “Hetiang tawrhchhel ngai thil tih hi Guinness World Records lo siam nual tawh Valerjan Romanovski hnung zuia ka tih ve a ni te pawh kan ti thei ang chu. Ani hi hetiang vur-a invur rei record siam tura min sawihmuhtu a ni,” a ti.
Valerjan pawh hi Polish tho niin, ani hian vur tui chhunga mipa zinga inhnim pil rei thei ber record siamin, minute 58 a awm thei a, thirsakawra off-road a darkar 12 chhunga tlan thui thei ber record siamin, km 314.65 a tlan hman bawk.
Damian hian vur (ice) a taksa zawng zawng vur veka awm rei thei ber record pawh a lo siam tawh a, darkar nga leh minute khat leh second 33 a awm thei. He record hi a hmain Valerjan-a’n a siam a, darkar thum leh second 28 a awm thei a, a record hi Damian hian a rawn khum a ni.