Ward No.19 ah BJP candidate a tlin chuan vbch 550 pe dawn

AMC Ward No.19 corporator thlan turah BJP candidate a tlin chuan sawrkar laipuiin AMC tan cheng vaibelchhe 550 a pe dawn tih BJP Mizoram president Vanlalhmuaka chuan a sawi.
Ward 19 by election atana campaign beihpui thlak mekah Ningani khan BJP hian street campaign an nei a. State president hian AMC inenkawlna atan kum khata central atanga sum kan hmuh chu vaibelchhe 39 vel a ni a, tun by election-a BJP candidate an thlangtling a nih chuan lawmthu sawina atan vbch. 550 min pe dawn tih a sawi. AMC-in a thatpui hle dawn a, sum indaihlohna pawh nasa takin a phuhruksak dawn tih a sawi a ni.
Tunhnaia Hlimen, Melthum leh Tlangnuam Venga leimin avanga harsatna nasa tak kan tawk chu state sawrkar atang chuan hmalak thui viau a har hle a rinawm a, nimahse tun tum AMC by election ah BJP candidate an thlang a nih chuan central tha chakna hmangin Ward-19 huamchhunga harsatna hi sutkian a nih theih nan theihtawp chhuahin hma an la anga, Union Urban Development minister Manohar Lal Khattar ngeiin Ward chhungah rawn tlawhin kan harsatna a hmunah min enpui dawn tih Vanlalhmuaka hian a sawi.
BJP official candidate K Vanlalruati pawhin Ward chhung harsatna hrang hrang an hmuin an hria a, Ward corporator tha tak an nei tawh a, Ward chhungah thil tha tamtak tih pawh an duh ang, nimahse tih theihna tur sum ber a awm loh avangin thil tha an ti hleithei lo a, a ni chuan central-a an hruaitute zarah, thlantlin a nih chuan chhungkua leh khawtlanga harsatna hrang hrang an tawhna lakah chhanchhuah an ni dawn tih a sawi a ni.