Warriors an chak ve ta

Thawhtan zing khan NBA khelh chhunzawm a ni a, season thara che chhe tluang, vawi ruk ngawt tlawm zawn tawh Golden State Warriors chuan point 121-116 in Houston Rockets an hneh a, an chak ve ta nge nge. Thawhtan zinga inkhel dangah champion lai Denver Nuggets in hnehna an chang ve bawk.
Chak lo tluang Golden State Warriors hian Houston Rockets lakah an khel tha viau a, quarter hmasa pathumah chungnung zawkah an tang vek a, point 11 a hmahruai chungin quarter hnuhnung ber an hmachhawn. Quarter hnuhnung berah point rukin hnufual zawk ni mah se point ngain an chak zui ta tho. Rockets an hneh tum hian Warrriors player pawimawh Stephen Curry chuan point 32 a thawkchhuak a, hei hi season kal meka a point thawhchhuah tam ber tum a ni.
Thawhtan zinga inkhel hmuhnawm takah champion lai Denver Nuggets chuan point 107-103 in Detroit Pistons an hneh thei hram. Harsa taka an chak tum hian two-time Most Valuable Player Nikola Jokic leh head coach Michael Malone te hnawhchhuah an ni. Thawhtannia inkhel dangah Giannis Antetokounmpo chuan Washington Wizards lakah Milwaukee Bucks a chakpui ve bawk