West Ham in Ward-Prowse la lut

West Ham in Ward-Prowse la lut
English Premier League club West Ham Unired chuan England midfielder James Ward-Prowse chu Southampton atangin an la lut. Ward-Prowse manah £30m hian vel bawr an seng tura ngaih niin, kum li daih contract an ziahpui.
Hammers midfielder thar Ward-Prowse hi freekick pet thiam tak mai a ni a, EPL-ah vawi 17 zet free kick atangin goal a thun tawh a. EPL-ah amah aia goal thun tam chu goal 18 thun tawh David Beckham chiah a ni a. Beckham record khum turin goal hnih thun chiah a mamawh tawh a. West Ham-ah kum li a cham chhungin Beckham record a khum hman ngei tura ngaih a ni.
James Ward-Prowse hian kum riat mi lek a nih laiin Southampton a zawm a, Saint tan hian inlen hrang hrangah vawi 410 zet a khel hman a, kum 2020 atang khan captain a ni. A chawrchhuahna club Saints-ah nuamti takin khel bawk mah se Championship lamah an tlahniam si a, top-flight huangah khelh zui a duh vangin Ward-Prowse hian Southampton kalsanin West Ham United a zawm ta a ni.
West Ham manager David Moyes chuan an midfielder thar James Ward-Prowse chu thiamna nei tha leh tlo, tawnhriat ngah leh hruaitu nih tling a nih thu a sawi a. An la lut thei chu lawmawm a tih thu a sawi a, hma an sawnpui ngei a beisei thu a sawi tel bawk. Hammers hian an captain Declan Rice chu Arsenal hnenah £105m in an hralh. Rice an hralh hnuin Ward-Prowse hi lak tumin an hel nghal chat a, thawhtanni khan an la lut fel thei ta a ni. Ward-Prowse an lak luh hma hian Mexico midfielder Edson Alvarez chu Ajax atangin an la lut tawh a. Manchester United nen Harry Maguire manah an inrem tawh