Kar kalta kha Russia-Ukraine indona thleng mekah Ukraine dinhmun tha taka a inherna tia sawi a ni a. Ukraine tana hun pawimawh niin a chhan ber pawh Western ram tangrual te chuan indona tualzawla hman tur tunlai thiamna sang ber ber hmanga siam tank te chu Ukraine hnena thawn luh an remtih tak vang a ni.
-- Advertisement --
Germany chuan Leopard 2 tank an pek tur thu sawiin US pawhin M1 Abrams tank a pe dawn bawk a. UK leh Poland te chuan tank an pek tur thu an lo sawi lawk sa tawh a, ram dangte pawhin Ukraine hnenah an pe zui tura ngaih a ni bawk a. Hei vang hian commentator thenkhatte chuan ‘gamechanger’ ni thei tiin an sawi.
Mahse tank te chu Ukraine-in indona mualah chakna a chanpui phahna tham a ni dawn em ni?
Ben Barry, senior fellow, International Institute for Strategic Studies (ISS) chuan Western tanks te chuan danglamna a siam ang a ti a. Mahse, British Army Brigadier hlui chuan awmzia nei thui vak lo turah a ngai thung.
Modern warfare-ah chuan offensive operation neih nan tank te chu pawimawh chungchuang an ni a, hmelmate inbunna chhu chhiaa territory laklet leh nana pawimawh a ni.
Awmze nei taka hman a nih chuan himna siam thei a nih mai bakah mi barakhaih viau thei a ni bawk a. An tam tham a nih phei chuan hmelmate defence pawh thiat zung zung thei a ni a. Mahse chu mi tu chuan vansang lam atanga thlawpna an mamawh thung a, lei lamah pawh an hmalakna zui turin sipai hnungdawltu an neih a ngai bawk.
History thlir chuan tank ringawtin indonaah a chakpui ngai lo. British te chu tank za chuang indona tuala hmang hmasa ber niin November 1917 khan battle of Cambrai-ah a hmang a. A tirah chuan hma an sawnpui viau a, mahse, German beihletnaah tank tam tak hmantlak loha awm zuiin British pawhin a lak tawh te a hloh leh zui a ni.
Tank te hi defence atan pawha hman theih a ni a. Kum 1940 khan Nazi runna laka an hnugntawlh laiin British leh French sipai te chuan Arras-ah Nazi hmasawn zel tur danchah nan an hmang a, British sipai te Dunkirk atangin an inlakchhuah theih phah tawh bawk.
Ukraine chuan khawthlang ram te tank pek te chu Russia-in thal thawta a beihna tur laka invenna tur mai bakah a territory hloh tawh te laklet leh nan a nih thu a sawi.
Ukraine-in tank te hmatawnga a hman theih dan
Ukraine-in khawthlang ram atanga tank a dawn te chu Russia nena an ramri 1,000km vela thuiah khat tawkin a dah phauh phauh a rinawm lo. Russia defence chhu chhe turin Ukraine chuan a sipaite a hlawmkhawm a ngai a, 5-20 km huam chhungah a thlurbing a ngai.
British Army Royal Tank Regiment a colonel hlui Hamish de Bretton-Gordon chuan hma la tak tak turin tamin awmzia a nei a ti a. Operation neih dawn tak tak chuan armoured brigade-ah tank 70 tal a awm a ngai a, hei vang hian western tank 100 vel chuan awmzia a nei thui khawp ang, tiin a sawi.
Ukraine hian tank tam zawk nei se la chuan nikuma north leh south lama offensive operation hlawhtling taka a neih ang kha nasa zawkin a kalpui thei an ti bawk a. Hei mai bakah hian military tena ‘combined armes manoeuvre’ an tih mai additional support a mamawh bawk.
UK chuan Ukraine hnenah hian Challenger tank 14 mai bakah artillery self-propelled gun 30 bakah sipai te phur leh humhim tur armoured vehicles a thawn tel dawn bawk.
Ukraine a pek thar tur zingah hian mine breaching leh bridge-laying vehicle te pawh a tel a, hengte hi Ukraine-in Russia nawr let nana a mamawh ngawih ngawih te an ni.
US pawhin Ukraine hnenah Bradley and Stryker armoured vehicles 100 chuang a pe dawn bawk a, Germany pawhin tank bakah Marder infantry fighting vehicles 40 a pe dawn bawk.
Tank-te hi a hmatawng tur te niin open ground-ah rang taka che vel thei an ni a. Challenger 2, Leopard 2 leh M1 Abrams te hi Russian siam tank te aia chak zawk leh hmun harsa a tlan thei zawk vek an ni bawk.
Western tanks te hi Russian tank te aia 20 tonnes vel laia rit an ni hlawm bawk a. Additional armour a neihin himna nasa zawk a pe chungin tank te hi lei siam chawp te zawh tur chuan a rit lutuk mai thei bawk a. Russia leh Ukraine-te hian hmalakna tihthuanawp nan lei tihchhiat an nei ve ve bawk.
British Challenger tank squadron commander hlui de Bretton Gordon chuan Western siam tank te that bikna chu zanah pawh duhthalin an che thei a ti.
Night sights leh thermal image te nena thuam vek an ni a, Russia-in hetiang a neih ve chu T-90 tank te chauh an ni a, western tank te hi chuan zan khawthim chhah berah pawh duhthalin chet an la thei a ti bawk.
Ukraine tana harsatna nasa ber tur chu logistics zawk niin fuel, ammunition leh spare parts te mamawh ang huna hman tur awm reng thei siam chu a ni. Ukraine in a tank neih te chu Soviet hun laia mite vek kha an la ni a, tunah chuan western tank te enkawlna hautak tak a buaipui tel a ngai tawh dawn a ni.
Barry chuan Ukrainian engineers te chuan diesel-engine hmang Leopard leh Challenger te chu a chhia pawh an siam tha mai thiam ang a. Mahse, US siam Abrams te ang chu gas turbine hmang a ni a, German siam Leopard te ai pawha fuel a let hniha tam mamawh a ni, a ti bawk.
Khawthlang ram te an thutiama an ding a nih chuan Ukraine armed forces chuan tank 100 chuang a neih belh dawn a. Mahse, chu chuan Ukraine mamawh chu a la phuhru pha lo hle dawn thung.
Nikum October thla khan general Valerii Zaluzhnyi chuan Ukraine chuan tank 300, infantry fighting vehicles 700 leh howitzers 500 tal kumin chhungin a mamawh dawn a ti a, a zahve vel chauh a neih theih hmel thung.
Heng tank leh ralthuamte hmang thiam tur hian trainign lak ngei ngei ngai niin hun a duh dawn bawk a, a kar a kar emaw a thlaa thla emaw a ngai dawn a, heng ralthuamte hian eng hunah nge Ukraine a thlen dawn pawh a la chiang thei chuang lo bawk.
US chuan M1 Abrams tanks te Ukraine a thlen tur chuan a thlaa thla mamawh a la ni thei a ti a, Ukraine chuan Khawthlang ram te chu an sipai te venghim turin indo thlawhna a mamawh tiin a dil zui bawk.
Western officials te chuan thal a thawtah Ukraine chuan beilet turin a inchhek khawl thawkhat thei turah an beisei a. Chu chu hun remchanga ngaih niin Russia erawh a sipai leh ralthuamte neih belh thei lova awm mekin ammunition supply lamah pawh harsatna a tawk mek bawk.
Ukraine hian amah ringhleltute a barakhaih fo tawh a, mahse, dingchang reng tur chuan Khawthlang ram tanpuina mamawhin Russian forces te a ram atanga umchuak tur chuan khawthlang ram te puihna tel lo chuan tihngaihna a awm lo bawk.