White House-ah Trump-a’n Zelensky leh Netanyahu kawm

President Donald Trump-a chuan a hranin Ukrainian President Volodymyr Zelensky-a leh Israeli Prime Minister Benjamin Netanyahu-a te a kawm a, White House chuan inkawmna ‘tha leh hlawk tak’ niin a sawi.
Hruaitu pahnihte hi Washington-a Israel thlawptu leh US-in Ukraine a puih thin tha ti em emtu, tun thla tir lama thi, Senator Lindsey Graham-a vuinaah an tel.
Zelensky-a leh Trump-a hian Kyiv-in boruaka beihna laka invenna hmanrua a neih theih a beisei meka US puihna awm theite an sawi dun.
Netanyahu-a hian US nen Iran an thlir dan a inan loh mek laiin a tlawh ve thung.
A zin chhuah hmaa thuthar lakhawmtute a kawmnaah Zelensky-a hian Trump-a hi tun thlaa Nato summit-a Ukraine-in Patriot interceptor missile siam chhuah phalna pek a nih theih nan a nawr dawn tih a sawi.
Ukraine hi hun rei tak American Patriot missile neih duh niin Russian drone leh missile laka Ukrainian khawpuite venna atan an mamawh hle niin a insawi.
Trump-a chuan mi dang tel lova an inkawmna hi ‘tha takin a kal’ tih Truth Social-ah a tar lang.
Hetih laii hian US hian sipai thilah Ukraine a pui dawn tih sawi chian a la awm lo va, Zelenksy-a erawh chuan Trump-a’n Ukraine chu a ram chhunga Patriot missile siam chhuah ve phalna a pe dawn niin a sawi thung.
“A pawm a, phalna min pe dawn,” tiin Fox News hnenah a sawi a, ‘a siam chhuahna lam aiawhte nen pawh kan inhmu’ tih a sawi a. “Kan siam chhuah dun ngei ka beisei,” a ti bawk.
Patriot hi tun hnaia Russian-ten Ukrainian khawpuite kah nana an hman nasat tak, ballistic missile dang thei air defence system thei tlem te zinga mi a ni.
Km 1,000-a sanga thlawk rocket thlengin a kap thla thei a. Pakhat hian pariat zel bitum theiin 100 chuang a dang thei a. A man erawh a to va, Patriot pakhat hi $ maktaduai 3 atanga 5 inkar vel a ni.
Zelensky-a’n Washington a chhuahsan hnua lawkah Netanyahu-a’n White House thleng vein Trump-a nen an inbe zui a, Iran chungchang an sawi dun.
Ram tang dun tha tak thin hi tun hnaiah neuh neuh an nei a, Trump-a hian Israel-in Lebanon a kap zui zel leh inkahhai engah mah a ngai lo chu a sawisel thin.
An inbiak zawhah Trump-a hian Truth Social-ah ‘inkawmna tha tak’ a nih thu a tar lang.
Netanyahu-a pawhin Israeli chanchinbute hnenah an pahnihin ‘kan tum kan inhrilh dun a, Iran-in nuclear ralthuam a neih loh kan duh dan leh kan tum dangte kan inhrilh tawn’ tih a sawi.
“US president ka biak tawha boruak a that ber tum a ni,” a ti bawk.
An thlalak dun pawh Netanyahu-a X-ah tar lan niin Oval Office-ah nui chungin thlalakna lam an en dun lai a ni