Wimbledon hmeichhe inkhel

Inrinni Wimbledon hmeichhe singles third round match pakhatah champion lai Elena Rybakina chuan 6-1, 6-1-in Wimble-don singles draw-a Briton inhamtang hnuhnungber Katie Boulter a sawp a, a title kawl lai humhim turin hma a sawn zel.
Kazakhstan nula Rybakina hi Centre Court-ah ‘public enemy number one’ a ni chiang hle a, mahse, chu chuan amahah harsatna a thlen lo a, mipui zing atanga thlawpna thawm a dawn ve chhunte’n a tihlawm thu a sawi.
89th-ranked Boulter hnawtchhuaktu Kazakh third seed Elena Rybakina hian Brazilian 13th seed Beatriz Haddad Maia a tum leh ang.
Inrinni third round inkhel dangah Arynka Sabalenka pawhin a ‘A-game’ dik tak kha khel chhuak lehin, Russian Anna Blinkova lakah 6-2, 6-3 hnehna a lawm a, nikhat liamta maia la hriatchian loh Varvara Gracheva laka a talbuai hnuah Belarusian hian vawihnih an intawn tawha a hneh ve ve tawh Russian Gracheva laka a chungnunna a lantir leh.
Australian Open champion Sabalenka laka tlawm Blinkova kha major tournament-a fourth round la thleng ngai lo a ni a, tunah pawh third round a pel zo leh ta lo a ni.
Belarusian second seed Sabalenka hian round linaah Russian bawk a tum leh dawn a, chu chu 21st seed Ekaterina Alexandrova niin, 6-0 6-4-a Dalma Galfi hnehtu a ni.
Wimbledon ni rukna Inrinni khan Brazilian hmeichhiate zinga WTA ranking-a top 10 luah pha hmasaber Haddad Maia chuan a third round match-ah 6-2, 6-2-a 37th seed Sorana Cirstea hnehin a vawikhatna atan Wimbledon fourth round a lut.
Czech ninth seed Petra Kvitova pawhin 6-3, 7-5-a Serbian qualifier Natalija Stevanovic hnehin last 16 a lut ve bawk.
Kum 28 mi Kvitova hian first round-ah world number one hlui Karolina Pliskova a lo hneh tawh a, 2019 US Open champion Bianca Andreescu hnehtu Tunisian sixth seed Ons Jabeur a tum leh ang.
Kvitova hi Berlin khawpuia grasscourt title a lak nen match riat a chak zawn mek.
Nikum Wimbledon runner-up Jabeur hian Centre Court-ah 3-6 6-3 6-4-a Andreescu hnehin fourth round lamah Wimbledon-a vawihnih champion tawh Kvitova a su dawn a, record siam belh turin hmachhawp hautakin a hmuak.
Jabeur hian nikum khan All England Club-ah history siamin, Arab player zinga Grand Slam final lut hmasaber a ni a, 2022 US Open-ah pawh Arab zinga US hard-dourt grand slam tournament final khel hmasaber nihna a lo chang tawh bawk.
Inrinni match kha nikum final-a Elena Rybakina a hneh loh hnua Centre Court-a Jabeur inkhelh leh vawikhatna niin, Andreescu lakah fiahna khawng a paltlang.
Kum 2011 leh 2014-a Wimbledon champion Kvitova leh Jabeur inhmachhawn tur hian ngaihven a hlawh a, a chhan pawh player pahnih hi vawinga an lo intawng tawh a, tah chuan African hi vawikhat chiah a la chak a, chu chu kum 2022 Sydney hard court kha niin, tuntum hian grand slam title awhna nena inbelhkhawmin Kvitova laka chak duhna chhan a neilian hle tura ngaih a ni a, a tlawm tawhna zozaiah phuba lak a duh thu a sawichhuak tawh bawk.
Czech ninth seed Kvitova pawhin Jabeur nena an insut leh tur chungchangah inthlakna pindana hun hlimawm tak an hman dun thin thu leh ani nena an intum leh tur phurawm a tih thu a sawi a, Arab player chu rang taka game thlakdanglam thut thei player a nih thu leh mihring mihrinna zawnah pawh nu ropui tak a nih thu a sawi.
American Madison Keys pawhin 6-4 6-1-a Ukraine player Marta Kostyuk hnehin round lina a lut ve bawk.