Wimbledon khel thei tawh tur Russian leh Belarusian player-te

Wimbledon khel thei tawh tur Russian leh Belarusian player-te
Ukraine run kawnga inthurual ram pahnih Russia leh Belarus tennis player-te chu nikum khan Wimbledon-a an tel ve phal a ni lo a, an thutlukna siam avang khan All England Club chuan sawiselna nasa tak a tawk a, kuminah erawh he’ng ram pahnih player-te hian London khuaah tour-nament lian an khel thei tawh dawn.
Russian leh Belarusian player-te hian kumin grasscourt Grand Slam-ah an ram hming erawh an la chhawm thei dawn chuang lo a, neutral player ni chunga an inlan a ngai thung ang.
All England Lawn Tennis Club (AELTC) lamin phalna an tihchhuah tak avangin Russian men’s world number six Daniil Medvedev leh Belarusian women’s world number two Aryna Sabalenka-te pawh kumin Wimbledon-ah hmuh tur an awm thei tawh dawn a ni.
Kumin Wimbledon hi July ni 3 atangin All England Club-ah khelh tan tura ruahman a ni.
AELTC chairman Ian Hewitt chuan ram behchhan nei loin Russian leh Belarusian player-te chhuah phalsak tawh mah se dan loa Russia-in a thenawm ram a run kal mek chu an la dem reng tih sawi chungin Ukraine mipuite thinlung takin an thlawp zui zel dawn tih a sawi a, an thutlukna siam chu a awlsam tak leh lap taka keuhtlu an ni lo tih sawiin, a nghawng tur zawng zawng an ngaihtuah tel vek tih a tarlang tel.
An thutlukna siam hian Queen’s leh Eastbourne telin Wimbledon inbuatsaihna tournament dang zawng zawng pawh a huam tel nghal vek a ni.
AELTC thuchhuah chuan UK sawr-kar bakah Lawn Tennis Association (LTA) leh international stakeholder-te berawn thlap chunga thutlukna puitlin an ni tih tarlang telin, AELTC leh LTA chuan nikuma an dinna ngai reng kha an rilru la ni mah se tennis professional tour lian pahnih men’s ATP leh women’s WTA lamin LTA membership an ‘cancel’ dawn avanga thutlukna thar siam chauh an nih thu an tel puang bawk.
Heti hi a nih tak avangin men’s leh women’s ranking lama world top 10 luah pha Russian trio Daniil Medvedev, Andrey Rublev leh Daria Kasatkina-te kumin nipui thawt lai hian All England Club-ah kan hmu thei tawh dawn a; kumin Australian Open champion Belarusian women’s world number two Aryna Sabalenka pawh inlan tura beisei a ni.
Tarlan tawh angin, Wimbledon khel tur player-te bakah an support staff-te’n neutral nihna nena inkhelh an duh tih hi ziaka an puan a ngai dawn a ni.
Sport tam zawk chuan Ukraine run avangin Russian leh Belarusian team-te chu an pawl intihsiaka tel ve an khap hlawm kha a ni a, mahse, ATP leh WTA chuan ram pahnih player-te hi neutral flag hnuaiah an inlan thei tur a ni tiin thutlukna khauh zet an tichhuak a, nikuma Wimbledon-in tel ve an phalsak loh avang khan Wimbledon chu ranking point a ken tel thin an chhuhsak nghe nghe.
Thla hmasa mai khan Ukraine player hriat hlawh Elina Svitolina chuan BBC Sport hnenah Russian leh Belarusian infiammite chu Ukrainian pawi sawi lo an thah kal zel avangin Wimbledon khelh khapsak chhun-zawm ni se tiin a lo sawi tawh a; ni-kuma Wimbledon thutlukna siam kha UK sawrkar pawhin thlawpin, You Gov poll-in mipui ngaihdan a lakah British mipui 69% laiin an thlawp.
Sap pachal ngaihdan ni lo mah se kuminah All England Club chuan a thutlukna a tidanglam ta a, a chhan pawh nikuma ram pahnih player an danbeh avang khan pawisa an chawi bakah WTA leh ATP lam chuan hnam bil thil avanga inenhranna an kalpui leh chuan LTA membership tihtawpsakah an vau zui ta tlat a, an duhdan ni lo chungin thutlukna thar an puang ta a ni.
An thiltih avang khan WTA lam chuan LTA kha US dollar 750,000 (£608,355) chawitirin, ATP phei chuan US dollar maktaduai khat (£811,140) ngawt an chawitir a ni.