Wolves lakah Brighton an chak nuamsa

Inrinni zana English Premier League khelhah Brighton & Hove Albion chuan 6-0 ngawtin an mikhual Wolves a sawp. Inkhel dangah Crstal Palace chuan 4-0 in West Ham United an sawp a. Brentford lakah an tlawm vangin Nottingham Forrest chu dinhmun chhe zual zawkah an din phah.
Brighton an thochhuak nghal
FA Cup semi-final ah uiawm taka an tlawm hnuin Brighton an hnual rei lova, EPL-ah chiang zeta hneh na changin an thochhuak leh nghal. Brighton hian Amex Stadium-a an mikhual Wolves lakah chawlh-lawk hmain goal li ngawt an thun a, chawlhlawk hnu lamah goal hnih thun belh zui lehin, an mualah ngei nuamsa takin hnehna an chang.
Table-ah pariatnaa awm mek Brighton hian an mikhual Wokves lakah bul an tan tha viau a. Inkhel tan atanga minute 6-na lekah Deniz Undav chuan Danny Welback siamsak atangin hmahruaina goal a thun nghal. Hma taka goal an thun hian inkhel a sawi danglam nghal dawrh a. Phu taka inlan Brighton hi an mikhual Wolves in dan ngaihna an hre lo a ni ber mai.
Undav goal thun hnu hian minute 13-na lekah Pascal Groß chuan Enciso siamsak atangin an goal hnihna a thun a. Pascal Groß vek hian minute 26-naah Enciso siamsak atang vekin an goal thumna a thu zui leh. Darkar chanve em pawh an khelh tlin hmaa goal li ngawt an thun vangin Brighton hi an chak ngei dawn tih a chiang kuarh tawh a. Wolves in an nawr let theih miau loh vangin goal an chhuah belh a rinawm viau bawk.
Rinlawk ang ngeiin Brighton hian chawlhlawk hmangin goal dang an thun belh zui leh, Minute 39-naah Danny Welback chuan an goal lina a thun a, si li faia hmahruai chungin chawlhlawk an hmang.
Chawlhlawk hnu lamah mualneitu Brighton an khel tha chhunzawm a, goal an thun belh leh thuai. Minute 48-na lekah Danny Welback chuan an goal ngana a thunin an hmahruaina a tizau leh zual a. Goal hmahruai thuntu Deniz Undav chuan minute 66-naah an goal rukna thunin a tawp a khar a. Brighton hian an mualah hnehna lian sualchhuakin, si ruk fai ngawtin an chak zui ta a ni.
An mualah nuamsa taka hnehna chang Brighton hian khelh 31 atanga point 52 hmuin pariatna an luah mek a. An chungchiaha awm Liverpool nen point khat chauha an inthlauh bakah Brighton hian vawi khata an khelh tlem zawk bawk vangin Europa Conference League tal khelh phak beiseina sang zawk an nei thar. Brighton in European competition an thlir laiin Woves erawh hi chuan championship a tlak hniam pumpelh tumin tan an khawh zui a ngai ve thung ang.
Palace pawh an chak nuamsa
Inrinni zana inkhel dangah Crystal Palace chuan an mikual West Ham United chu si li fai ngawtin an lo sawp a, an mualah hnehna nuamsa an sualchhuak ve bawk.
London derby-ah Eagles hian bul an tan tha viau a, minute 15-na lekah Jordan Ayew chuan hmahruaina goal a thun. Ayew goal thun atanga minute nga hnu lekah goal dang an thun belh leh nghal a. Nipui bazar inhawn hunah chhuak a, Marseille pan tum anga sawi Wilfried Zaha chuan minute 20-naah goal thunin, an hmahruaina a tizau. Zaha goal thun hnu hian Jeff Schlupp chuan minute 30-naah an goal thumna a thun a. Si thum faia hmahruai chunga chawlhlawk an hman hnuin minute 66-naah Eberechi Eze chuan penalty atangin an goal lina a thun zui leh cheu a, an mualah 4-0 in an chak zui ta a ni.
Inkhel dangah 17-naa awm mek Nottingham Forrest chuan an khingpui Brentford chu 2-1 in an hneh lova, Nottingham hian tlak an hnaih leh zual sauh a. An hnuai chiahah awm a, tla thei dinhmuna ding mek Leicester City nen an inkarah point khat lek a tla zep mek a. Foxes aia an khel tam zawk vangin an dinhmun a derthawng hle.