Working women hostel sak tum

State Level Committee on SASCI chu an chairman, chief minister Lalduhoma hoin Thawhtanni khan an thukhawm a. Part X of SASCI 2024-25 atanga hmun pasariha Working Women Hostel sak dan tur an rel.
Hemi atana PWD-in ruahmanna a siam sawifiah a ni a. A vaia sum sen tur zat hi vaibelchhe 127 a ni. SASCI part X hnuaia working hostel-te hi sak a nih chuan guidelines sawi angin amaha inenkawl zel theia public private partnership anga enkawl zui tur a ni.
A sakna hmun tura rawt chu – ZMC Complex, Lunglei Ramthar Veng, Thenzawl Field Veng, Ramhlun Sports Complex, ITI Complex Aizawl, Champhai Kahrawt Veng leh Khatla Aizawlah te a ni a. An len zawng a inang vek loa, a then khum 140 awm theihna tur a nih laiin a then chu khum 40 awm theihna tur te a ni.
Thutkhawmah hian PWD minister Vanlalhlana, Social Welfare minister Lalrinpuii, LESDE minister Lalnghinglova Hmar, adviser to CM (Finance) TBC Lalvenchhunga, MLA leh member dangte an tel.