World Cup atanga tlakin South Korean football-ah nghawng a nei lian

2026 World Cup group stage pel zo loa an tlak hnu Pathianni khan kum 2024 atanga South Korea head coach hna thawk tan Hong Myung-bo chuan thaha vauna a tawk a; a hna vawn lai a chawlhsan thu pawh puang nghalin, an ram a thlenpui chinah thupha a chawi zui nghal
He coach hi World Cup semi-final thlenpuitu kum 2002 team-a an captain kha niin, kumin hian Group A lamah an ram chu bul a tan fuhpui a, 2-1-in Czech Republic an hneh nghal.
An game hnihnaah Son Heung-min, Lee Kang-in of Paris St-Germain leh Bayern Munich star Kim Min-jae kawl chungin a thlengtu pakhat Mexico lakah goal thun theihna hun remchang vawi duai lo an bawhpelh a, si khat faia tlawmin, he mi chinah hian Taeguk Warriors tan beiseina a la bo lo a, last 32 lut pha turin South Africa laka point khat hmuh a tawk thei dawn a, mahse, African-ho lakah an tlawm leh ta zel a, an ram mipui leh football hruaitu, an player hluite lung a awi lo ngang mai!
Manchester United star hlui Park Ji-sung pawh nghawi mai mai thei lo zingah telin, “Kan hun tawn hi a hrehawmin, a lungchhiatthlak a, he hmuna kan tawp mai chhan hi kan chhuilet ngei a ngai ang,” ati ve bal bal!
He thinrimna kal zel hian coach thaha vauna hial a thlen tak avangin World Cup atanga an tlak hnua an ram an thlen hnuah pawh South Korea player leh staff-te khan an in leh lo an pan nghal mai lo a nih hmel a, mipui vantlangin an hriat mai lohna hmunah an thukru niin an sawi!
2014 World Cup laia captain ni chunga group-stage paltlang zo lo tawh bawk Hong hian a captain leh captain leh an innghahna lian berte zinga mi la ni reng Son kha an tlawmna game-ah bench a luahtir mauh pek kha a ni a, an han tlawm zui tak zelah chuan Tottenham Hotspur defender hlui Lee Young-pyo pawh a lawm lo ngang mai a, a thutna pakhat television sawikhawmnaah South Africa laka an chak lohna game kha kum zabi 21-na chhunga Korean football team match chhe ber ti hialin a ang chhuak!
2018 Asian Games gold medal a awrh avanga an ramin thalaite tana thla khat tal sipai tan ngei ngei ngaihna dan pawh Tottenham star hlui Son hian a lo pumpelh tawh a; tun July thlaa kum 34 a kai chhoh ve tak bawk si avangin a international career a zialfel zui ve tawh mai rinna a lian chho ta hle a ni.