Asia khawmual atanga World Cup 2026 khel tur zawnnaah Ningani zan khan Japan chuan si hnih faiin Bahrain an hneh a, World Cup khel tura tling hmasa ber an ni. Japan an chak rual hian Australia pawhin hnehna an chang a, World Cup an hnaih ve deuh deuh bawk.
Group C hmahruaitu Japan hian Saitama Stadium 2002-ah an group-ah pangana luah mektu Bahrain an mikhual. An mikhual lakah bul tan tha viau lo mah se chawlhlawk hnu lamah goal hnih an thun. Japan tan hian Crystal Palace midfielder Daichi Kamada chuan minute 66-naah hmahruaina goal a thun. Goal thun hmasa zawk an nih vangin an phur viau a, an mualah ngei inrintawkna sang zawk nen an inlan chhunzawm.
Inkhel hmuhnawm takah goal a luh belh theih loh reng hnuin Real Sociedad winger Takefusa Kubo chuan hun tawp dawn hnaih minute 87-naah an goal hnihna a thun a, an hmahruaina a tizau. Kubo goal thun hnu hian goal dang a luh belh thei tawh lo. Goal a luh belh theih tawh loh vangin Japan chuan an mamawh point thum an hmu a, khelh thum ngawt khelh hmabak la nei chungin Japan hi World Cup 2026 khel turin an tling. 2026 World Cup hi ram pathum; USA, Mexico leh Canada ten an inthlen tawm dawn a. Heng ram pathumte hi inelna thlengtu tur an nih vangin World Cup khel tur an ni nghal a. World Cup khel tur zawnna hmachhawn zingah World Cup khel tura tling chiang hmasa ber chu Japan hi an ni thung.
Japan an chak rual hian Group C-a pahnihna Australia pawhin an mualah awlsam takin hnehna an chang ve bawk. Point 7 hmu tawh Australia hian point ruk hmu tawh Indonesia chu Allianz Stadium-ah an mikhual a, an mualah 5-1 ngawtin hnehna an chang. Australia tan hian Martin Boyle, Nishan Velupillay leh Lewis ten goal khat theuh an tun a. Jackson Irvine chuan goal hnih a thun ve bawk. Indonesia goal neih chhun hi minute 78-naa Ole Romeny thun a ni.
Group C-ah hian khelh 7 atanga point 19 hmuin table chung ber an luah nghet hle a. Khelh 7 atanga veka point 10 hmu tawh Australia in pahnihna an luah a. Astralia hi table hnuai bera awm mek China tan pawh lehpelh thut theih an la ni ve tlat thung. Group C-ah hian pahnihna nih inchuhna boruak a nung chho dawn hle.
World Cup 2026-ah hian ram 48 an inel tawh dawn a, Asia khawmual atang hian ram pariat an tling phawt ang a. Play-off atangin tlin belh theihna hun remchang a la awm thei dawn bawk. Asia khawmual atanga World Cup khel tur zawnna hnuhnung hi ram 18 tean an hmachhawn a, heng ram 18 te hi group thumah paruk theuhin then an ni.
Asia khawmual atanga World Cup khel tur zawnna hnuhnungah Group B hmahruaitu South Korea chu ningani zan khan an mikhual
Oman lakah an chak zo lova, 1-1 in an inhnehtawk. South Korea tan hian Hwang Hee-Chan chuan minute 41-naah hmahruaina goal thun bawk mah se Oman tan hian Ali Al-Busaidi chuan minute 80-naah a sut thung. An mualah chak se South Korea hian an hmahruaina an tizau thei dawn a. An mualah chak zawh loh vangin khelh khata khel tam zawk chungin Irag lakah point liin hma an la hruai.
Ningani zana inkhel dangah Group A hmahruaitu Iran chuan an mikhual United Arab Emirates chu 2-0 in an hneh a, World Cup an hnaih ce zel bawk.
World Cup khel turin Japan an tling
Get real time updates directly on you device, subscribe now.