World Cup qualifying: Brazil leh Argentina an tlawm

World Cup qualifying:
Brazil leh Argentina an tlawm
Nimin South American 2026 World Cup qualifying match pahnihah Brazil leh Argentina an chak lo ve ve a; chechhe rei tawh Brazil phei chu qualifying game an khelh hnuhnung vawinga an vawili tlawmna a ni tawh!
Paraguay 1-0 Brazil
Brazil hi Paraguay khawpui Asuncion-ah chak mamawhna sang tak nen lut mah se first half minute 20 an khel pel hlek tihah Inter Miami player Diego Gomez chuan Brazilian goalkeeper Alisson Becker-a dan zawh loh goal khungin, an siphurh hi mikhual team-in hun pumin an sut zo lo a, first half chhung phei chuan Brazil hian lehlam goal zawnah ball an thawnlut zo lo hrim hrim!
Estadio Defensores del Chaco inkhelah hian Liverpool goalkeeper Alisson bakah England-a inkhel dang pahnih Newcastle midfielder Bruno Guimaraes leh West Ham playmaker Lucas Paqueta-te chuan Brazil tan bul an tan a; tlarhma lamah Real Madrid trio Rodrygo, Endrick leh Vinicius Jr an intlar bawk.
Heti chung hian an vahchhuahna hmun atangin world champion vawinga ni thei awmchhun Brazil hian point khat pawh an hlawhchhuak zo lo leh a, game riat an khelh tawhah vawithum chiah la chakin, 2026 Fifa World Cup qualifiers an khelh hnuhnung vawiruka point 18 hmuh theihna atangin point li chiah an thawkchhuak a, South American qualifying table-ah pangana an luah pha tawk a, world cup khel turin an tling dawn em sawi theih a ni lo tluang zel!
Kumin January thla mai khan manager thar atan Dorival Jr an ruai a, kum 2022 World Cup-a quarter-final pelh pui zo lo Tite a thlak a, manager thar ho hian kumin nipui thawt laia khelh Copa America lamah pawh khan quarter-final an paltlang zo lo leh tawh!
Brazil defender Marquinhos chuan Brazilian TV Globo hnenah an coach-in team tana khelh dan tha ber a la enkual mek thu sawi chungin player thar tam lutuk chuan inrintawkna team chhungah a hlohtir tih a sawi a, qualifying chu eng tik lai maha awlsam a nih ngai loh thu leh hun inthlakthlenga an din mek avangin kawng dik zawh tura kawng an zawn hmuh a pawimawh thu a sawi a, inrintawkna an tlakchham rih avangin thawhrim an ngaih thu leh khelmuala result tha hlawhchhuah chu an harsatna tawh mek tana chhanna tha ber a nih thu a sawi.
Karliamta Zirtawpni khan Brazil hian sikhat faiin an mikhual Ecuador an hneh a, mahse, Paraguay laka an tlawm zui leh tak avangin point 10 an hmuh tawh an belhchhah zo lo a, tarlan tak angin, South American qualifying table-ah pangana an luah a, goal difference hmangin point 10 ve bawk nei Venezuela an hmakhalh hram.
Paraguay lakah khan hun pumin Brazil khan goal zawnah vawithum chiah ball an thawnlut zo a, target an fuh pathumna hi goal khung harsat Vinicius Jr kutchhuak vek niin, a club vawn mek Real Madrid tan pawh Brazilian hian goal thun a harsat hle a ni.
Brazil hian table-a an dinhmun hniam tawh tak siamtha turin thla thar hian Chile luhkhungin, chu mi zawhah Peru an mikhual leh dawn a ni.
South America khawmualpui ram 10-in kum 2026 World Cup khelh an inchuh mek a, an zinga point hmu sang paruk hi World Cup khel turin direct-in an tling ang a, pasarihna hian intercontinental playoff kaltlangin ‘chance’ an la nei leh dawn a ni.
Colombia 2-1 Argentina
Captain Lionel Messi tel loin Colombia khawpui Bogota-ah Argentina an fehchhuak a, an lama Real Madrid leh Everton midfielder hlui James Rodriguez-a penalty chhuihluh tuarin mikhual team hi Colombia lakah tlawm mah se khelh riata point 18 an khawl tlin hmangin world champion hian 2026 World Cup qualifying table-ah hma an la hruai chhunzawm.
2022 World Cup final-a France an hneh hnu khan Argentina hi match 18-ah vawihnih chiah an la tlawm.
Nimin Metropolitano Stadium inkhelah La Liga club Rayo Vallecano-in tunhnaia an lakluh thar Rodriguez a langsar a, kum 33 mi lai ni tawh mah se reigning world champion tan a la hnawksak pha hle.
Minute 25-naah Wolves player Yerson Mosquera goal hmahruai tauhluh tur a chhawpsak a; minute 48-ah Colombian defender-te tihsual hlawkpuiin Nicolas Gonzalez chuan Argentina siphurh a sut.
1-1 a nih hnu hian Nicolas Otamendi chesualin box chhungah Crystal Palace player Daniel Munoz a titlu a, video assistant referee review kaltlangin penalty a chawi.
Second half minute 60-ah penalty chhuih turin captain Rodriguez a rawn penchhuak a, Aston Villa goalkeeper Emiliano Martinez-a tluk lohna lamah petin thla hnih kalta Copa America final-a an hneh loh Argentina lakah phuba lakna goal pawimawh a chhuihlut.
Argentina hian hliam avangin Messi an chhawr thei lo a, an captain ropui tel loin striker pahnih Lautaro Martínez leh Julian Alvarez an chefuh zo lo.
Rodriguez hian inkhelh banah Argentina lama goal khung kha a suangtuah phak piahlam a nih thu sawi chungin engkim hnehtu team laka hnehna chan kha a lawmawm dan a thlum zual niin a sawi a; boruak lum lutuk avanga inkhelh a harsat thu leh chuti chunga duhthusama thaa an khelh theih avangin an chak dan a fair tawk tih a tarlang tel.
World Cup champion Argentina hian kumin July thla khan final-ah sikhat faia Colombia hnehin Copa America trophy an chawi a; kum 2019 hnu lama Argentina laka hnehna la chang leh ta lo Colombia chuan world cup qualifiers lamah world champion an hneh ve leh ta hlawl a, South American World Cup qualifying kal mekah tlawm an la nei lo.
Argentina hian 10-team table-ah hma la hruai chhunzawm bawk mah se an hnuai chiaha pahnihna luahtu Colombia lakah point hnih chiahin an sang tawh.
Nakkum September thla thleng awh tur fixture round 18-na khelh zawha a sang parukte automatic-in an qualify dawn tih tarlan a ni tawh a, pasarihna team chuan intercontinental play-off lamah confederation dang an tum leh dawn a ni.
South American 2026 World Cup qualifying match dangah goal awm loin Uruguay leh mualneitu Venezuela an inhnehtawk a; he inkhelah hian thla hmasa maia Paris St-Germain chhuahsana Manchester United zawm thar midfielder Manuel Ugarte chuan Uruguay tan starting line upa a chang.