Xavi thlaktu tur zawng nghal chuk chuk lo

Barcelona player hlui Xavi Hernandez chuan season kal lai tawp rual hian head coach a nihna a bansan tur thu a nemnghet tawh a, boss thar tur inrinsiakna a vung chhoh mek laiin Barca player hlui dang, tuna he club sporting director hna chelh mek Deco khan chuti vut vuta manager thar lakluh tumna an neih loh thu a sawichhuak.
Tarlan tawh thin, January thla khan Xavi hian Barca boss nihna bansan a tum thu sawiin, result tha loin a team enkawl a bawh chhoh tak reng avangin mualpho taka ban aiin mahni thua chawlh puan a thlang zawk ni berin a ngaih theih!
He boruakah hian Catalan team chu manager thar dapa buai nghal chuk chuk leh candidate shortlist pawh tlarthla dul tawh anga sawi an ni a, mahse, Deco chuan he puhna hi phain, “A sawi pawh kan la sawi lo a, chhan pawh coach thar tur hi kan la zawn miau loh vang a ni. A la hun lo e. Season pawh a la tawp em lo a, kan hma lamah hian thil tamtakin min la hmuak a ni,” tiin Catalunya Radio a hrilh.
Xavi chawlh tur thu puan a nih hnu khan Barca hian game ruk chhung tlawm an pumpelh tling ta a, chutiangte a lo nih leh tak si avangin zawhna zawttute’n Deco chu Xavi an chelh leh mai ang em tih an zawt a, Portuguese chuan, “Thil inthlakdanglam a awm chuan kan bawh lo ang tih ka sawi ngawt thei lo. Amah dodalna engmah kan nei lo a, a chhuah tur chungchang thutlukna pawh hi club emaw sports manage-ment lam siam a ni lo. Chutih rualin, tun dinhmunah chelh tumna a awm hran lo a, a awm a nih tak leh kan la sawiho leh ang chum,” a ti.
Deco hian Xavi thlaktu tur an ngaihtuah hmain club-in 2024-25 campaign atana an ruahmanna an final phawt tur thu sawiin, “A hmasaberah chuan kan project duanchhuah duh dan tur kan ngaihtuah phawt ang a, chu chu eng chiah nge tih kan duh tih leh eng player nge kan sengluh ang tihte hi ni se.
“Kan player kawl mek tam ber hian la cham zui zel an duh a; chutih laiin high-level coach kan tih ang chi kha market-ah duh duh thlan tur an awm lo. Coach zawng zawng tih theih deuh thaw hi contract nei lai an ni a, chuvangin, a hun a lo thlen tikah thutlukna dik chu kan siam mai dawn a, tun erawh coach zawn khuk ruai hun a ni rih lo,” tiin an head coach chhawr lai thlaktu tur zawn kawnga an phi ruai rih loh thu a sawichhuak.