YMA Day kum 88-na hman a ni YMA Day pualin tanpui ngaite pui

Young Mizo Association din chhan zinga pakhat – |anpui ngaite tanpui, tih chu he pawlin kum 88 a tlinnaah hmun hrang hrangah a taka kalpui a ni a. Buaina avanga Mizorama sahimna zawngte awmna thenkhatah chuan anmahni tan he hun hi YMA member-ten an hmang. YMA Day hi YMA branch hrang hrangten anmahni pualin an hmang a. Zingkarah mahni huamchhung tifaia hnatlang an tam a, an huamchhung veka tanpui ngaite tanpuina atan leh, member-te intihhlim leh intihsiak ni atan te, zirlai pass thate chawimawina atan leh, hmun thenkhatah chuan an din champha – Jubilee lawmna atan hmang pah an awm bawk. Chhun lam chauha hun hmang an awm a, chhun leh zan lama programme siam an awm a ni.
Branch thenkhatah chuan ‘YMA Chhang’ te pualin item siam a ni a, tun kan dinhmun – Zo nun ze mawi bo zel tur vawnhim tul dan ngaihtuahin YMA Chhang hi tharthawh leh theuh a, vung leh thiam taka kalpui tul tihna a lian hle tih thu dawn a ni.
Central YMA bakah Sub Headquarters YMA, Group leh Branch zingah a mamawhtute hnenah sumfaia luangchhuak an awm a. Central YMA bik hian YMA Day denchhenin India ram khawpui lian 7-a Mizo Welfare hnen bakah Silchar Branch leh Shillong Group hnenah sumfaiin tanpuina a hlan. Hriat theih chinah Sub Hqrs. Lunglei leh leh Serchhip chuan an huamchhunga home ah te tanpuina sumfai an hlan a, damdawi in hnena thilpek pe an awm bawk. Branch zingah home leh damdawi in lama thilpek pe an awm.
Mahni huamchhunga chanhai, puih ngaite puia luangchhuak an awm a, in sak thatsak ngai sa thaa he ni hi hmang an awm bawk.
Lawngtlai district-a Tuichawng Group YMA chuan YMA Day pual hian Bangladesh atanga raltlante tanpuina an hlan a. Central YMA-in Bangladesh raltlante tanpuina tur Tuichawng Group YMA kuta a dah hmangin buhfai an sem. Thudawn danin tunah hian an group huamchhungah Bangladesh atanga raltlan 825 awma ngaih a ni.
YMA Vaitin Branch chuan YMA Day hi intihhlimna buatsaih loin Manipur atanga raltlante chenna tur in an sak ni atan an hmang a. Manipur-a Zofate thlaphang leh mangang taka an awm laia hlimna lam hawia hun hman hi, Branch executive thukhawm chuan tha ti loin, hetiang hian hun an ruahman nia sawi a ni
Central YMA general secretary Prof. Lalnuntluanga chuan Chawlhmuna YMA Day a hmanpuinaah YMA chu Pathiana innghat pawl thianghlim, politics rawngkai lo, mi tin huapzo pawl leh Zo nun ze mawi – tlawmngaihna lungphuma neitu a ni a; vantlang inzirna hmunpui ‘Zawlbuk’ aiawhtu a ni, tiin a sawi.
“YMA chu sawrkar chhiat thata mawhphurtu, sawisel mai loa thurawn petu; a ni chu ni, ni lo chu ni lo ti thin, rintlak loh leh belhchian dawl lo laka fihlim, belhchian dawl a ni tur a ni,” a ti. Ram leh hnam humhalhna’n zirna, thiamna finna kawngah nasa zawka ke pen a tul tih sawiin, sawichhuak tam thei nih aia thawk chhuak tam nih tum thalai YMA member kan ramin a mamawh, a ti bawk.
YMA hi Young Lushai Association tih hming puin kum 1935-ah din a ni a. Tunah member 4,73,872 awmin, Sub Headquarters 8, Group 50 leh Branch 820 a awm a ni.