YMA Day vawi 89-na hman a ni Zonun zemawi din thar ang – CM

YMA Day vawi 89-na chu June 15 khan Mizoram chhung leh pawna YMA dinna hmun hrang hrangah hman a ni.YMA branch tam zawk chu zingkarah mahni veng huamchin tifaiin an hnatlang a. Chhun lama YMA member leh YMA Chhang tan intihsiak leh intihlimna nena hun hmang an awm a ni. Khua/ veng chhunga puih ngai – damlo kan, in sak that leh thildanga pui an awm a; Member kum naupang zawkte Mizo nun zia inzirtirna atana hmang a, thlan laih leh thildanga tia hun hmang an awm bawk.
Chief minister Lalduhoma chuan YMA Biate Branch-in YMA Day an hman a hmanpui a. Khawtlang nunah chona kan hmachhawn nasa a. Khawtin leh vengtin YMA branch ten mahni zawnah theihtawp chhuaha kan beihlet loh chuan ram leh hnam tichhe thei thil an ni tih a sawi. “Tui leh leilung kan enkawl danah insiamthat kan ngai a, nun thlahdah vanga kum naupang taka thihna, nupa inthenna, HIV/AIDS, cancer a tam hle a. Rukruk a hluarin, thalai vakrawlai kan tam tual tual a. Pi leh pute atanga kan neih Zo nun zemawi a boral nasa ta. Hawh u, din thar leh ang u, mitinin mahni zawnah mawhphurhna kan nei vek a ni,” tiin YMA member-te a sawm.
YMA Biate Branch-in mi harsa, in luah tur hmu mai lote tlanluh lailawkna tur an sak mek puih nan chief minister hian cheng nuai 3 a pe a ni.
Central YMA president Lalhmachhuana chuan YMA Day thuchah a siamah, ram leh hnam humhalh turin YMA-in theihtawp a chhuah thin tih a sawi a. Ruihhlo leh sualna hrang hrang do kawngah, a bikin thalaiten nun kawng dik lo an zawh tur vennaah YMA-in nasa takin hma a la a, theihtawp a chhuah zel dawn tih a sawi.
“Sual do kawnga thawhpui tur mimal leh pawl an awm a nih chuan YMA-in thawhpui theih loh a nei loa, ram leh hnam thatna atan chuan ke kan pen zel dawn,” a ti. Hma an lak tawhna zawng zawnga tha thawhtu mimal leh branch hrang hrang chungah lawmthu a sawi a ni.
YMA-ah Zohnahthlak zawng zawng an leng vek a; Central YMA chuan inpui an nih inhriain, hnam peng hrang hrang tan YMA kawngkapui a inhawng reng a, pawl leh chi anga inlak hran tha an ti ngai lo tih Central YMA president hian a sawi. “Kan hmalam hunah harsatna a lo thleng a nih pawhin YMA chu a tlanchhe ngai dawn loa, Zohnahthlakte tan a ding reng dawn. Zofate inpui a nihna hi a vawngnung reng dawn a ni,” a ti.
Ruihhlo bakah tunlai khawvel changkanna in a ken tel thiamna leh khawthlang nunphungin Mizo thalaite a nuai mek lai hian, Mizo takin a changkan theih a, Mizo takin a ropui theih tih Lalhmachhuana hian a sawi a. Mizo nun zemawi vawngnung turin Mizo thalaite leh mipui a chah tih a sawi a ni.
YMA Day hmannaah hian sawrkar hotu, minister leh MLA ten hmun hrang hrangah an hmanpui a. Central YMA bakah Sub Hqrs. YMA/ Group YMA zingah an huamchhunga Home, damdawi in YMA Day denchhena tanpui an awm a ni.
Central YMA record neih danin, tunah hian YMA Branch 821, Group 50, Sub-Hqrs 8, YMA member 4,90,601 an awm a; member zingah mipa 286,858 leh hmeichhia 203,743 an awm. Mizoram chhungah YMA Branch 767 a awm a, Mizoram pawnah Branch 54 a awm a ni.