Zalenna pualin Music Festival nei

Akashvani Aizawl leh Govt Mizoram Law College tangdun chuan India zalen lawmna pualin Zirtawpni khan Independence Music Festival an buatsaih.
Festival hmanpuitu Assembly speaker Lalbiakzama chuan rimawi chu mihringin lawmna kan neih lanchhuah tirna langsar ber zing ami a ni, tiin, rimawi hmanga kan ram zalenna lawm chu a inhmeh hle tih a sawi. Music chu thusawi, infuihtharna leh inpumkhatna hmanrua chak ber a ni thin tih a sawi a. Rimawi chuan ramri, nunphung leh kum thliar loin mitin thinlungah thu a sawi thei tih a sawi a ni.
“Rimawi hian inhre ngai lo, hnam hrang leh ram hranga cheng, tawng dang hmang pawh min kuah khawm thei a. Mihring a hlim ber laiin hla hmangin a hlimna a puangchhuak a. Lungngaihna vawrtawp a tawrh pawhin rimawi hmangin a tawrhna a lantir thin a. Mihring nun laimu luahtu a ni,” a ti.
Govt. Mizoram Law College principal Dr Esther L Chhangte pawhin thu a sawi a. Chhinlung Cultural Club-in hnam lam leh Independence costume parade an entir a. Certificate leh radio sem a nih bakah Indian Independence Day kaihhnawihah quiz neih a ni a. Hetiang kar lakah hian MZI member leh Law College zirlaite atangin zai ngaihthlak a ni.