Zelenskyy-a’n prime minister Svyrydenko-i rawt

Zelenskyy-a’n prime minister Svyrydenko-i rawt
Ukrainian President Volodymyr Zelenskyy-a chuan Economy Minister Yulia Svyrydenko-i chu indonain an ram a tihbuai em em kara sorkar insiksawiah prime minister atan a rawt.
Thawhtannia he rawtna a puan rual hian Russia-in kum thum leh a chanve kal ta atanga a rûn mek karah sorkar hmelhmang thar deuh diau a din a rinawm ta hle a ni.
“Yuliia Svyrydenko-i chu Ukraine-a sorkar hruaitu atan leh hna thawh mekte tithar turin ka rawt a ni,” tiin Zelenskyy-a chuan social media-ah a tar lang a. “Sorkar thar chet chhuahna tur chu rei lo te-ah ka puan theih thuai ka beisei,” a ti bawk.
Prime minister thar tur a rawt hi Ukrainian sorkara ‘thutlukna pawimawh siam thei chin siksawina’ tur a nih thu a sawi bawk.
Zalenskyy-a hian an pahnihin ‘Ukraine-in eibara theihna a neih te, Ukrainian-te puihna tur zau zawka dap dan tur leh ram chhunga ralthuam an siam tihpun dan tur te’ an sawi dun tawh tih a tar lang tel.
Kum 39 mi, Svyrydenko-i hi kumin kum tir lama United States nen ram leilung hausakna vâng chi inleisak tura indawrnaah khan a ring a rawlh thuk hle a, Kyiv hian sipai lama amah puitu ram lian ber hi inremna a neihpui thei lo tep nghe nghe.
President-in a rawtna hi a tlang a nih chuan kum 2020 atanga prime minister thutthlenga thu, Denys Shmyhal-a a thlak dawn a ni.
“Mipuiten thil danglam an duh tawh avangin sorkar hi thlak a ngai,” tiin economy minister hlui, Svyrydenko-i thawhpui thin, Tymofiy Mylovanov-a chuan a sawi.
Mylovanov-a hi tunah hian Kyiv School of Economics-a an hotupa a ni mek a, sorkar fawng vuantu inthlak chuan kum thum chuang indona an kalpui mekah ‘tha thar’ a awmtir a rinawm tih a sawi bawk.
Zelenskyy-a hian Defence Minister Rustem Umerov-a chu Washington-a an ram palai atan a ruat dawn tih kar hmasaa thuthar lakhawmtute a kawmnaah a lo sawi tawh bawk.
Zelenskyy-a hian kartawpah khan Umerov-a hi a kawm nghe nghe a, a hnuah, “Ukraine hian United States nen inkungkaihna hlawk zawk a mamawh a, kan ram venhimna lamah hian inawpnaah rahbi thar a ngai bawk,” a ti.
Svyrydenko-i hi deputy prime minister a ni sa mek bawk a, Kremlin-in February, 2022-a a rûn tan hma lawk khan Ukraine eibar dinhmun hniam tak khai chhuak turin economy ministry enkawl tur hian ruat a ni.
Prime minister thar tur rawtna hi parliament-in a pawmpui a ngai dawn a, an rorelna ina thute hi indona a chhuah hnuah Zelenskyy-a lamtang deuh vek an nih avangin president rawtna hi dodaltu an awm a rinawm lem lo.