Zingkar hmang tangkai turin Sports minister-in zirlaite fuih

Zirlaite chu zingkar hmang tangkai a, hun vawng dik turin Youth Services minister Lalnghinglova Hmar chuan a chah.
Tuipuiral Zirlai Pawl (TZP) Gen. Hqrs. Aizawl buatsaih, ‘Hun Vawn Dik’ tih thupui hmanga Inrinnia TZP ‘Freshers’ Social’ a hmanpuinaah Youth Services minister chuan, mihlawhtlingten hun an hman dik thin avangin zirlaite chu zingkar hman tangkai tum a, hun vawng dik mi nih tum turin a chah. An chawrchhuahna zahpui loa a tihmingthatu nih tum a, mahni khawchhuahna ngaipawimawh tur leh nu leh pate thu awiha chawimawi thin turin a chah bawk.
Zirna kawngah inelna a nasat tawh thu leh midangte nen hna zawn kawngah an la inel a tul dawn avangin, hlawhtlinna chang thei tura tun atanga inpuahchah lawk turin a fuih a. Zirna tih loh thil danga inhnamhnawih tam lo tur leh rilru pawtpeng thei laka inthiarfihlim thiam turin a chah a ni.
East Tuipui bialtu MLA Ramthanmawia pawhin Tuipuiral tlangdung chu infiamna leh zirna lama theihna sang tak nei a ni, tiin, East Tuipui huamchhunga zirlai 39 hnenah MLA Award – laptop hlan a ni tawh tih a sawi. “Hei hian zirna a pawimawh zia tarlang thar leh se, zirnaah nu leh paten thahnemngai zualin tan lakna thar min pe se ka duh a ni,” a ti.
He hunah hian Utkrisht Seva Padak Award dawngtu, TZP president hlui, Mizoram Police sub-inpector PC Zirthanga chu chawimawina thilpek hlan a ni a. A president hlui tho, zirtirtu pension Lalhluna bakah doctor pahnih – Dr K Lalmuanawmi, BHMS leh Dr Nianglunkimi, MBBS te lawmpuina hlan an ni. Rank holder 6 – Zodinpuii, MA (Education) 1-na; Lalramhluni, D.El.Ed-a 2-na; Joseplh VL Rochhara, BA (Phil) 3-na; C Lawmsangzuali, B.Sc (Botany) 5-na; ZT Lalduatpuii, B.Sc (Maths) 7-na; Ramdinpuii, B.Sc (Geo) 9-na leh Zosangzuali, B.Sc (Botany) 10-na lawmpuina hlan an ni bawk.
MLA Award dawngtu HSLC leh HSSLC Exam-a distinction-a pass zirlai 6 hnenah bialtu MLA Pu Ramthanmawia’n laptop a hlan a ni.