Tlawmngai pawl kan nei tha hi kan vanneih pui – Chief minister

Mizoramin tlawmngai pawl a nei tha chu ramin a vanneihpui hle tih chief minister Zoramthanga chuan a sawi.
Ningania MHIP Day vawi 49-na, a bial Aizawl East-I chhunga Zemabawk North leh Thuampuia a hmanpuinaah Zoramthanga chuan MHIP chu Mizoramin tlawmngai pawl lian a neih, ramin a vanneihpui phah em em zing ami a ni, tiin, “Heng kan tlawmngai pawl anga khawtlang suihkhawm a, khawtlang hma ngai a, khawtlang tana hetiang khawpa thawk hi phai lamah leh ramdangah hmuh tur a vang viau in a rinawm a. Mizo chu ‘disciplined society’ vantlang nun invawngfel tak kan ni a; khawtlang nun felfai tak hi tlawmngai pawlte hnathawhah hian thui tak a innghat a ni,” a ti.
Sawrkar hmalakna tam tak pawh amah lawnga hma lak ai chuan, NGO kaltlanga hma lak a nih avanga hlawhtling ta zawk, state dang tan pawha entawntlak sawi tur a awm thin tih a sawi a ni.
MHIP member-te chu inchhung enkawltu pawimawh an nih avangin khawtlang nunah an pawimawh tih chief minister hian a sawi a. Chhungkaw nun tha chuan society tha hringin, chu chuan ram nuam a hring chhawng leh, tia sawiin, hmeichhiate pawimawhna a sawi a. Chhungkaw inrelbawlnaah mipa an pawimawh ang bawkin nu an pawimawh takzet tih a sawi bawk.
MHIP member-te chu zu leh ruihtheihthil hrang hrang, zuk leh hmuam lakah fihlima do pui turin a sawm a. Tunlai khawtlang nunah chhungtin deuhthaw tibuaitu zu leh ruihhlo do kawngah theihtawpin sawrkar leh khawtlang, tlawmngai pawl leh kohhran ang zawngin tan kan lak nasat viau rualin, do hneh dan awlsam ber chu heng thil mamawhna (demand) a awm loh hi a ni tih chief minister hian a sawi a. Mahni chhungkua theuhah bul tan a pawimawh tih a sawi a ni.
MHIP Day pual hian chief minister chuan a bial chhunga MHIP branch hrang hrang hnenah lawmpuina sumfai a hlan a ni.