Zirtawpnia bar-a mi pali kap hlumtu la man lo
US sipai hlui, Montana bar-a mi pali thattu ni ngeia hriat chu Pathianni tuk (India-a thim hlim) thleng pawh khan a lirthei ruk, thawmhnaw leh camp-na hmanrua phur nen a chin la hriat loh niin hlauhawm a la ni zel tih thuneituten an sawi.
Thuneitute chuan kum 45 mi, Michael Paul Brown-a hian Zirtawpni tuk khan Missoula atanga chhimchhak km 120 vela hla, The Owl Bar, Anaconda, Montana-ah mi pali a that niin an hria.
Montana Attorney General Austin Knudsen chuan Pathiannia thuthar lakhawmtute a kawmnaah Brown-a’n pawi a khawihna silai hi dan kengkawhtute chuan ama ta niin an ring a. A kah hlumte hi kum 50 leh 70 inkar niin pakhat hi bartender a ni tih a sawi.
Knudsen-a chuan Brown-a hi pawi a khawihna khua, mi 9,000 chuang chennaa bar bul maia cheng a nih thu leh leng lut fo thin a nih thu a sawi.
A zawn hna thawh mek a nih avang hian vantlang thil tih khawm chu la thulh rih vek a ni tih tual chhung mite Facebook page-ah tar lan a ni hlawm.
Attorney general chuan man tuma theihtawp chhuah a ni tih sawiin ram hnuaiah pawh a naupan laia a camp-na thinte dap a ni a; mahse, Montana khawthlang lamah khualzin tam hun lai a nih avangin chet zung zung a harsa niin Knudsen-a chuan a sawi.
Brown-a hi armor crewman niin kum 2001 leh 2005 inkar sipaiah a tang a, Iraq-ah kum 2004 tir lam atanga awmin March, 2005 thleng dah a ni tih sipai thupuangtu, Lt. Col. Ruth Castro-a chuan a sawi a. Montana National Guard-ah kum 2006 atanga March, 2009 thleng a tang leh a, sipaiah hian sergeant a ni hman.
A u fanu, Clare Boyle-i chuan a patea hi kum tam tak rilru lam harsatna a nei niin AP a hrilh a, an chhungkua pawhin an pui fo tih a sawi.
Knudsen-a chuan Brown-a hi a hma pawhin dan kengkawhtuten an lo hre tawh tih a sawi a. A kah hlumte pawh hi a hmelhriat an nia rin a ni tih a sawi.
Man theih nana puitu chu $7,500 pek an ti a. “Hei hi Montana a la ni reng a. Montanan-te chuan mahni inenkawl dan an thiam a, khawngaih takin in hmu a nih chuan 911 lo bia ang che u,” tiin Knudsen-a hian mipui a ngen.