Zirtirtu an kal ngai loh vangin khawtlangin lungawiloh lantir

Lunglei district Mautlang khua zirna in pahniha zirtirtute chu an kal ngai loh avangin khawtlang nu leh pa mangang chuan Inrinni khan lungawiloh an lantir.
Mautlang Village Council leh All NGO thuchhuah danin, Upper Primary School leh Lower Primary School (SSA) an nei a, school building pawh tha tak a awm a. Chutihlaiin kum engemaw chen kalta atang khan school an kal mumal loa, khawtlang hruaituten theihtawpa zirtirtute an nawr chung pawhin ngaihpawimawh a hlawh lo tih an sawi. Kum tirah admission ti turin zirtirtute hi langin (ni khat) an lo kal a, a bak chu hmuh zui tur an awm tawh ngai lo tih an sawi a ni.
Zirna avang hian an buai a, an khaw naupangte chu an khaw thenawm Zehtet-ah nursery atangin school kaltir an ngaih phah a, an eizawnnaah pawh harsatna an tawh phah a, chhungkaw tam tak an buaiin, kum tam tak sikul kal loa heti zat naupang an awm mai mai tur chu an ngaihtuahin an lung a awi lo hle tih an sawi.
Hei vang hian khawtlang hruaitute, nu leh pa leh sikul naupang ho nen lungawiloh an lantir ta a, sawrkar thuneitute chu, Mautlang UPS leh LPS zirtirtute an post-ah regular taka an awm theihnan hma lak sak a; mahni post-a regular taka awm thei tur zirtirtu sawrkarin ngaihtuah sak tur leh, zirtirtu indaih lo nasa lutuk pawh phuhruk sak turin an phut tih an sawi a. An thilphut hi a hlawhtling lo a nih chuan nasa zawka lungawiloh lantir leh an tum tih an sawi a ni.