Zirtirtu lak tur Versus Practical teaching….

Education minister Dr Vanlalthlana chuan zirtirtu lak thar zingah lehkha thiam ringawt ni lo, zirlaite zirtir thiam an ni ngei tih hrechiang turin an exam-naah practical teaching an ti tel zel tawh, tiin tunhnaia Hnahthiala MSU general conference a hmanpuinaah khan a sawi a. Zirtirtu hna lakah fair takin, advertisement tel ngeiin qualify leh thiam tak tak chauh lak an ni tawh, a ti bawk.
District Institute of Education and Training (DIET) awm chhan kan hria a, teaching profession kawng zawh turte tana ‘training-na hmunpui’ a ni. Sawrkar pawhin sawrkar school-a thawk tur chu trained teacher an ni ngei tur a ni, a ti a. Trained teacher zingah rau rau pawh, naupang zirtir dan thiam leh thiam lo an la awm leh dawn a, chu chu practical-a an inelna tur ber pawh a ni.
Tunhmain sawrkar hna thawk tur laknaah ‘political fitness’ tih tawngkam a lar hle a. Hnathawk tur laknaah, an thawh tur hnaa thiamna bik nei an awm laiin, thiamna bik nei lem lo, political thil avanga duhsak zawng sawrkar hnaa thun luh kha an tam niin sawi a ni thin. Sawrkar hnathawk ni ve si, hna thawk thiam lo, an thawhpui ten an awi nun mai mai emaw, ruihhlovin a tihbuai avanga hna thawk tha thei lo te pawh an ni mahna!
Education-ah phei chuan, political fitness kaltlanga teaching hna thawk an awm a nih chuan, zirlaite tan chuan ‘chhiatna nasa tak thlentu’ an ni hawt dawn tihna a ni ber awm e. Medical lama thiamna nei lovin medical doctor hna thawk ve ta ngawt dawn se, chutiang vel chu a ni!
Zirnaah hian a pawimawh ber chu ‘a bul tan that’ hi a ni. Ram changkang apiangin elementary/primary school an ngai pawimawh a, kindergarten enkawl tur pawhin naupang enkawl lama thiamna bik nei an hmang/ruai thin.
Keini ramah chuan a hniam lam zirtir turin education qualification hniam kan hmang hlauh thin. Naupangin an ti chho ve nawk nawk a, high school an han thleng a, a awmzia hre lem lovin, vaki tawng thei an sawi ang maiin ‘by-heart’ system-in mark tam tak chu an hmu ve mai. Zirlai tam zawk hi chu an thleng sang tawlh tawlh a, an bo sang tulh tulh ni mai hian an lang. Chutiang vel chuan kan zirna hi kan lo in-awi nung ve thin a ni ber awm e.
Zirtirtu lak dawna ‘practical teaching’ neih te hi chu tih ngei ngei zawk tur niawm tak a ni a, ‘tunah chuan practical teaching kan ti zel tawh’ kan la ti leih leih chauh mai hi chu, All India Services emaw, Central Services emaw-a kan luh hleih theih lohna chhan leh, state danga hna zawng tura kan innawr chhuak hleithei lote hi ‘a nghawng’ kal zel a ni mai lo maw a tih theih rum rum awm e. Zirtirtu lak dawn te chuan ‘practical teaching’ lo ti ngei ngei rawh se; private school-te pawhin.