Zirtirtu lakah politics a inrawlh kan phal lo – Education minister

Zirtirtu lakah politics a inrawlh kan phal lo
– Education minister
Zirna a pawimawh avangin zirtirtu lakah politics a inrawlh an hlau a, zirtirtu lakah kher chuan politics a inrawlh an phal lo tih School Education minister Dr Vanlalthlana chuan a sawi.
Aizawl District Education office chuan Ningani khan sawrkar enkawl school principal leh headmaster tan intuaitharna a buatsaih a. Hmanpuitu School Education minister chuan, sawrkar apiangin zirna siamthatnan an theihna leh thiamna an hmang zel a. Tun sawrkar pawhin siamthat hna a thawk mek tih a sawi.
“Zirna a pawimawh avangin zirtirtu lakah politics a inrawlh kan hlau a, zirtirtu lakah kher chuan politics a inrawlh kan phal lo. Chumi hmang chuan zirna siamthat kan tum a. Tunhnaia Samagra Shiksha hnuaia zirtirtu lakah leh casual teacher lakah pawh a thiam thiam lak an ni,” a ti.
Sawrkarin langtlangin hna a thawk a, vskmizoram.com ah zirtirtute attendance, Samagra Shiksha hnuaia hnathawh pawh a duh apiang tan en theih a ni tih Dr Vanlalthlana hian a sawi a. Pawl 3 &6 ah random-in exam buatsaih a ni a, beisei aiin result a tha a, NITI Aayog-in best practices-ah an dah dawn an tih hial thu a sawi a ni.
Transfer & posting draft rules chu hrual that mek a ni tih sawiin, “A duh apiang en theih turin chhawp chhuah a ni dawn a. Mipui inrawnkhawm siam a ni dawn a, ziaka rawtna thehlutte chu inrawnkhawmnaah hian koh an ni dawn a ni,” a ti.
Refresher meeting-ah hian Aizawl Municipal Corporation huamchhunga sawrkar school, deficit, adhoc aided leh Samagra school atangin headmaster leh principal-te an tel a. Primary school headmaster 110, middle school headmaster 94, high school headmaster 42, higher secondary school principal 19, an vaiin 265 an tel a ni.