Zirtirtu mamawh ang lakfel phut

Vawiin, June 26 hma in Mamit High School-II a zirtirtu mamawh ang chu sawrkarin la fel turin an phut tih Mizo Students’ Union chuan an sawi.
MSU District Hqrs. Mamit thuchhuak chuan kumin January 10 khan High School-II Managing Committee-in Science zirtirtu dilna DEO Mamit-a a thehluh chu, a tuk January 11 khan DEO hian directorate-ah dilna siamin, February 2 khan zirtirtu lak dilna hi directorate atangin phalna tih chhuah a ni.
April 5 khan DEO Mamit hian February 2-a phalna tih chhuah tawh chu a hmu chauh a, chuti chung chuan DEO hian thla khat ral hnu, May 12-ah zirtirtu lakna turin School Managing Committee hnenah hriattirna a pe chauh tih an sawi.
February 2-a directorate atanga issue tawh si, DEO-in hun rei tak file a kal tir lo chu hriatthiam har an tih thu MSU hian sawiin, zirlaite ngaihsak tawk lohnaah an ngai a, chhan tha tak sawifiah turin DEO hi an phut tih an sawi.
May 15 khan zirtirtu lak turah advertisement chhuah niin, dilna thehlut mi 9 an awm a; diltute hi B.Sc (B.Ed), M.Sc (M.ed) an ni a. Interview hun atan June 7 ruat ni mah se, zirtirtu lak tur chungchangah RTI hmanga zawhna zawh a awm avangin June 19-a postponed a ni, an ti.
2015 Recruitment Rules anga Managing Board advertisement tih chhuah tawh hi a dik lohna MSU chuan a hre loa, DEO pawhin a dik tih a pawm avangin, interview hi a rang thei ang bera kalpui chhunzawm turin an phut tih an sawi.
Zirlaite leh School Managing Committee phut leh RR 2015 No.2 column 11(a) a tarlan angin, hna 30% hi Science/ Mathematics graduate leh 70% hi Arts graduate quota-a lak tur a ni a. Hei bakah hian MBSE affiliation regulations 2012 phut angin, high school-ah Science graduate pahnih tal professional degree nei an awm tur a ni, tih a ni a. Heng RR leh Regulation-in a sawi ang hian Science graduate emaw a chunglam thiamna nei ngei la turin an ngen tih an sawi a ni.
School Managing Committee-in a phut angin, 2023 June 26 ralhmain an mamawh zirtirtu lak fel an duhna chu MSU District Hqrs Mamit chuan a thlawp a, June 26 ralhmaa lak a nih loh chuan June 27 atangin hma an la dawn tih a sawi.