Zirtirtu tana quarters sak turah ruahmanna siam lawk

District Level Education Committee Khawzawl chu an chairman, bawrhsap K Lalrohlua hoin Thawhlehni khan an thukhawm a. Finance changtu, chief minister Lalduhoma’n budget-ah zirtirtu quarters sakna tur dah a nih thu a sawi chu Khawzawl district chhungah tangkai leh daihzai taka hman a nih theih dan tur an sawi ho.
Chairman chuan zirna kawnga hma sawn chu a thil ngaihpawimawh ber zing ami a ni, tiin, Mizoram sawrkarin kumin budget-ah zirtirtute quarters sakna atan cheng vaibelchhe 30 chuang a dah chu lawmawm a tih thu a sawi. Hemi bawhzui kawnga District Education Office-in ruahmanna a lo siam chu thlir ho a ni a, khawtin mamawh dan a inan loh theih avangin ngaihpawimawh dan indawt (priority list) siam nise, an ti.
Tunhnaia thli leh ruah thawkin sikul a tih chhiat chu SDRF hnuaiah DEO kaltlangin chhawmdawlna pek nise, tiin an rel a. DEO hian khaw tina khawtlang hruaitute leh sikul enkawltute kaltlangin sikul thawmthat hna hi an enpui ang.
Thutkhawm hian Khawzawla sawrkar zirna in hrang hrangten zirlai an neih dan leh zirtirtu an neih dan an thlir ho a, sawrkar enkawl primary sikul hrang hranga zirlai inziaklut an pung chu thil lawmawm tak nia an hriat thu an sawi a ni.