ZMC-a zirlaiten state sawrkara thawk zui turin bond year sign – Health minister

Mizoramah medical doctor indaihlohna phuhruk turin Zoram Medical Centre-a zirlaite chu ‘bond year’ an sing pui thin tih Health & Family Welfare minister Lalrinpuii chuan a sawi.
Zirtawpnia NE Khawdungsei Primary Health Centre (PHC) building sak thar a hawnnaah Health minister chuan, Mizoramah doctor indaih lo hle mah se, sawrkar hmalaknaa medical officer awm thlapa NE Khawdungsei PHC changtlung tak hawn a ni thei chu lawmawm a tih thu a sawi a. Doctor indaihlohna phuhru turin sawrkarin hma a la mek zel tih sawiin, ZMC-a zirlaite chu sawrkara an thawh theih nan bond year an sign thin tih a sawi a ni.
NE Khawdungsei PHC sak zawh a nih theihnana tha leh zung sengtute chungah lawmthu a sawi a, mipui chu a enkawl zui kawngah thawktute tha taka thawhpui turin a chah. Khawdungsei mipuiin MUHCS an hman theih loh chhan block account manager an neih theihna atan an khuaa B.Com zir chhuak thlang chhuak se, an hman theih a ring tih a sawi.
Lengteng bialtu MLA, minister F Rodingliana pawhin, kum 20 chuang hman mumal loha awm tawh, NE Khawdungsei PHC tangkai taka hman a ni thei tawh tur chu lawmawm a tih thu a sawi a. A hlawhtlinna kawngah khawtlang mipui thawhhona leh Health minister hmalaknaah lawmthu a sawi a ni.
NE Khawdungsei PHC hi 2024 November 19 khan sak tan a ni a, kumin May 18 khan sak zawh a ni. He PHC chhungah hian casualty, male & female ward, main centre, kitchen, consultation room, delivery room, preparation room, ophthalmic assistant room, minor OT, laboratory, Ayush room, allopathy room, nurses changing room, X-ray & dark room leh toilet block a awm a ni.
PHC hawn zawhah Health & Family Welfare minister hian NE Khawdungsei Aganwadi Centre, Khawkawn Sub Centre, Pawlrang Sub Centre leh Saichal Sub-Centre a tlawh bawk