ZMC-ah phir inzawm zai hrang

Mizorama a vawikhatna atan phir, an taksaa inzawm ‘conjoined twins’ chu Zoram Medical College-ah hlawhtling takin Nilaini khan zai hran an ni a. ZMC NICU-ah uluk taka enkawl mek an ni.
Thin (liver) pakhat intawm an nih avangin nausen pahnih hi thin pakhatin a chawm zawh dawn loh avangin naute pakhat zawk chhanna’n thin hi zai phel a ngai a; a zaitu Team leader Dr John Lalliandinga, Associate Professor of Surgery and Paediatric Surgeon, ZMC hoin plastic surgeon, general surgeon leh anesthesiologist ten darkar thum chhungin an zai zo a ni.
He chanchin buatsaih lai hi chuan an pahnih hian la dam ve ve in, ZMC NICU-ah uluk taka vil ve ve an ni.
Nausen pianghlim zaite hi Lawngtlai district-ah kumin February 9 khan an piang a, an awm leh dul a inzawm bakah an thin (liver) a inzawm a ni. Zai an nih hma hian ZMC radiologist-ten contrast CT Scan hmangin an thisen zam inzawm dan an zirchiang hmasa a, test chi hrang hrang an paltlang hnu ah hnimhlum thiamte nen inrawnin, an nu leh pa te remtihna (consent) an lak hnu ah pakhat zawk talin a damchhuah pui beiseiin zai a ni.
ZMC hotute sawi danin, conjoined twins hi nausen pianghlim an taksa inzawm emaw, taksa peng leh kawchhung inzawm tlat tihna a ni a. Khawvelah hetiang hi a vang em em a, khawvela nau piang nuai khatah pakhat a awm thin anga ngaih a ni. Taksa peng pawimawh ‘vital organs’ a inzawm an nih thin avangin damkhawchhuak zo loa vanduai palh a awlsam hle tih an sawi a ni.