Zo hnahthlakte chhantu lung inah la awm

Nikum lamah khan Manipur-a Zo hnahthlakte tan a lo au tawh a,
tha a lo thawh tawh. Zo hnahthlakte ram hi Manipur sorkarin lak a tum tih a hmu a, chu chu a dodal thin. Manipur sorkarin a man a, lung inah a tang mek.
Mark Haokip a ni a, Manipur sorkar thiltih dan pawm lotu niin, Zo hnahthlakte tan activist a ni. Forest reserve atan te, hmasawnna hnathawhna atan te Manipur sorkarin dik lo takin Zo hnahthlakte ram lak a tum tih a hmuhin a theih ang angin a dodal a, hei hi Manipur sorkarin a haw hle.
Social media lamah Manipur ram dik tak chu 700 square miles vel chauh a ni a, a bak chu tlang mite ram a ni tih a ziak a, chumi hnu lawkah a zinna Delhi-ah Manipur Police te’n kal chilhin an man ta a ni.
Tun thlengin lung inah a tang a, a tannaah hian Zo hnahthlakte pawh an thawk ve. Mahse Manipur buai hnuah Zo hnahthlakte hi an tlanchhuak a, chhuak ve thei lo Mark Haokip hi biakpawh theih a ni rih lo.
Mark Haokip hi Zoramin zalenna a sual laia rammu Limkhosei Haokip fapa a ni a, a pa atanga Zo hnahthlakte insuihkhawmna tuipuitu a ni.
A nau Lalcha Haokip hnen atanga thu dawn danin, Mark-a hi Imphal-a lung in lian ber Sajiwa Jail-ah a tang a, hetah hian SP te, jailor leh mi dang Zo hnahthlak paruk pasarih vel an awm. May thlaah Zo hnahthlakte leh Meitei an inepa an buai khan Zo hnahthlak zinga awm Meitei-te leh Meitei zinga awm Zo hnahthlakte chu an mite hnenah an tlan ve ve a, Sajiwa Jail-a thawk Zo hnahthlakte pawh chu an mite zingah an kal ve. Chumi hnu chuan Mark Haokip hi biak theih a ni ta lo a, Zo hnahthlakte tan Imphal a him loh avangin a kal chilh theih si loh.
A nau Lalcha hi Aizawlah a cham mek a, a u chanchin, biakpawh dan te ngaihtuahpui theitu tur zawng turin Aizawl hi a pan ve tawp mai a ni. MZP-in chief minister hmuhpui an tum a, mahse an inhmuh tur ni-ah rokhawlhna a awm avangin an hmu thei lo. Chumi hnu-ah a la rem lo a, chief minister hi hmuh ngei a la tum.
A pa a lo rammut ve avang pawhin chief minister leh an party laka pangchang ngam turah a inngai a, a u a ngaihtuah em avangin, Sajiwa Jail-ah a la awm a nih pawhin him damin a awm tih hriat a duh a, chumi atana puitu tur zawngin Aizawlah a cham ve tawp mai a ni.
Mark Haokip hi Manipur sorkar chuan hel pawl hruaitu, Manipur dotu, Manipur thendarh tumtu tiin an sawi. Ani chuan Kangpokpi district, Chandel district leh Churachandpur district tea Zo hnahthlakte’n an ram an chan loh nan a bei a, Manipur sorkarin chhuhsak a tum tih chu a hmuh dan a ni.