ZOFATE HI INDIAN KAN NI EM?- REV DR.ZAICHHAWNA HLAWNDO. A REJOINDER
Lal Dena
Rev. Dr. Zaichhawna Hlawndo zawhna hi nitin chanchinbu Aizawl Post, 8 July, 2026-a mi online-ah ka lo chhiar a. Zawhna pawimawh a nih avângin han tuihnih ve hlek ka duh a.
Pu Zaichhawna hi ka mi ngaihsân, theology lamah zir sâng, lekhabu pawh enge mawni zât lo ziak tawh, thusawi thiam, kohhran hruaitu zînga politician bera ka hmuh a ni. Hnam nihnaah (Mizo/Zo nationalism)-ah a chiang êm êm a. Ama hruaina hnuaia Thenzawl-a Zofate Hnam Lungphunte leh khawvêla Biakin lianber a sak mêk te khi a ropuiin sawiin a siak lo. Zoram thar lo piang tûr, independence tûr leh a sermon te video/U-tube-ah te ka lo ngaithla thîn a, ngaihnawm ka tih thîn. Mahse, engtin nge Zoram chu a independence ang tih hi a sawi tel thîn loh avângin, ka lo buai ve êm êm thîn. Mahni chakna ringawta independence sual chu pialtlepa luh tum ang chauh kan ni dawn si a.
Kan hriat theuh angin British sawrkâr khan Mizoram hi kum 1890 atang khan a rawn awpbet ve ta a. Pu Zaichhawna sawi dân chuan Zofate hi British rorêlnain India lak ata min then hrang a, rorêlna hmanrua hrang hmangin mi awpbet a, Vaiho pawh duh thâla Mizorama luh leh chên theih loh nân inner line permit hmangin min awpbet a ni tiin a ziak a. A dikna chin a awm. Chu mai nilo, kum 1935-a British sawrkârin political Reform siamin Government of India Act, 1935 an rawn introduce khan tribal area te kha excluded areas hnuaiah an dah a. Mizoram pawh chu excluded areas hnuaiah chuan min dah ve a ni. British ho ngaidânah chuan sophisticated representative institution hi hnam mâwl kan la nih avânga phu lo ni a min ngâih zâwk vâng a ni. He Constitution-a arrangement hi Pu Zaichhawna ngâidân chuan Mizoram chu India ram chhungah belh a nih lohna chhan angin a ngâi zâwk a. Hei hian super-structure (lârsâp) level-ah British India nêna min thlun zawmtu zâwk a ni.
British rorêltute khan Indian sub-continent an rawn hneh ve leh India kha hmun hnihin an then a – British India leh native states. Colonial system of control pawh chi hnih an hmang nghâl bawk a. Direct-a an lâk British India-ah direct rule an hmang a, native (princely) state zawng zawngah indirect rule an hmang ve thung a ni. Chung native states-ah te chuan colonial agent – British resident, political agent leh political superintendent te an dah a, chutah lal leh raja (maharaja) te hmangin inderect-in mipui chungah ro an rêl thîn. British rorêltute khan an awpbeh hnamte chungah ‘divide and rule’ an hmang a, mahse a chunga sawi tawh ang khian super-structure level-ah chuan British rorêlna kha India ram nêna min thlung zawmtu integrating force a ni hlauh thung. Eng dang vâng ni lovin duh ila, duh lo ila, British imperiâlism chu India ram nêna min tihpumkhattu a ni a; British India leh native state te inpumkhattîrtu pawh a ni nghâl bawk.
Pu. Zaichhawna’n India tih hming intan dân a sawi hi dik thaw khatin ka hria. Ti hian a ziak a, “India tih hming chu India (Sindhu) lui hming atanga lo chhuak niin, a ram mite khawsak dân, hnam dân leh an sakhua milem pathian be mi an ni dân te sawinâ’n Shindu emaw Hindu emaw tih hi hman a ni a, chu chu India emaw Indian emaw lo chhuahna chu a ni. An hnam, ram leh sakhua hi sawi hran emaw, then hran theih tak tak a ni lo. Zofate chênna ram hi India ramin a huam ngai lo”. Chuvângin Zofate chu Indian an ni lo a tihna a ni.
Pu Zaichhawna ngaidan hi a dik thawkhat viau. Mahse hei aia thûk zâwkin han chhui ta ila. India chu engtin nge hnampui (nation) a rawn nih mai tih hi a thawnthu bulthut han chhuibing ta ila. Hmânlâi atang tawh khan India rama Assamese, Bengali, Bihari, Gujarati, Kanada, Kashmir, Konkani, Malayalee, Maithili, Marathi, Muslim, Orya, Panjabi, Tamil, Telugu, etc, an awm a. An chênna ram leilung hnianghnâr zâwk vâng leh, zirna lama an lo sân zâwk vângin civilization sâng zâwk an lo nei a. British rorêl kum za chuang chhûng khân nationality angin zâwi zâwiin an lo insiam hman a. Politics lamah thanharhna an lo nei hmasak zâwk vângin hêng hnam (nationality) zawng zawng intêlkhâwm hian core nationalism (Indian nationalism) an rawn siam chhuak ta a ni. A chhan chu hêng hnam te hian thawnthu bulthut zêm khat (shared historical memories), thawnthu hmun khat (common epics of Ramayana and Mahabharatta), hnam nunphung huang khat (common culture and caste system), tawngkhat hmang (Hindi/Urdu) leh sakhua thuhmun (Hinduism) leh dân hman tlângpui an neih inan avângin hnampui zêm khat (Indian nation)-ah harsatna awm miah lovin an lo inchhung lût vek ta a ni. Chung hnamte phuarkhâwmtu Indian nationalism rah chhuah chu Indian National Congress, Hindu Mahasabha leh pâwl hrang hrang te an ni. Chûng party te hmang chuan British awpbehna lak ata zalênna Indian freedom movement nawr runpui chu an tan chho ta a ni.
He freedom movement hi Pu Mahatma Gandhi hruaina hnuaia India mithiamte bâkah, India mipui, mimir loneitute thlengin an rawn zawm ve ta a. Mahse, chhinchhiah tûr pakhat pawimawh êm êm chu hei hi a ni: Indian freedom movement a sân lâi ber pawhin Indian nationalism tuifâwn chuan Brahmaputra phaizâwl bâk a chîm phak lo! Hei hi thawnthu dik, tuma hnial rual loh chu a ni. Indian hruaitute pawhin an hria. Indian writer Pu H.K.Sareen chuan zêp nei hauh lovin tihian a ziak a, “Those in the leadership of the national movement paid scant attention to the masses of the people in the hills and valleys of Northeast India. That is why they did not or could not revise any ethos of breaking the barrier created by the imperialist rulers and drawing the masses into the struggle for independence. This remained one of the weaknesses of our national movement”.(H.K.Sareen; Insurgency in Northeast India: A Study of the Sino-American Role,1980,p.3)-tih hi a dik zawk ngei a rinawm.
India ram zalênna atân Zofate hian thawh (contribution) kan nei ve em? Nei awkawng lo. Indopui II-na lai vêl khân kan mithiam hmasa ten politics lamah thanharhna tlêm rawn nei vein political party hrang hrang siamin independence emaw, Burma zawm emaw te kan tum thûl a nih kha! Mainstream Indian freedom movement-ah kan tel ve rêng rêng lo. British ho awpbehna vâng chauh leh Vai mifing ho dâwiâtna vâng chauha Indian Republic zawm ve ta kan ni! Political hmathlîr an lo nei lova. British ho lah khân tlâi khaw hnuah Crown Colony te an ti thûl. (He thu hi chu ni danga sawi tûra dah zâwk mai ila). Pu Neville Maxwell, English-Australian Journalist-in hêng hnamte hi thawnthu tihpalh (historical accident) vâng chauhva India mi an ni zâwk tia a lo sawi hi Rev. Dr.Pu Zaichhawna Hlawndo zawhna chhanna tha berah ka ngâi.