Zofate zalenna sualtute kawm

Mizo Zirlai Pawl chuan zalenna sualtu zinga hruaitu dinhmun chelh tawh, tuna la damte chu Nilaini khan an kawm.
MZP Gen. Hqrs. hian 1966 March 1-a MNF-in zalenna a puan ni hriatrengna atan kum 2019 atangin hun a hmang thin a. Kumin hian ‘Zalênna sualtute kawmna’ buatsaihin, zalenna sualtu zing ami – War secretary Vanlalngaia, senator Bualhranga, Brig. Gen. R Sangkawia leh Col. Lalrawnliana te kawm an ni.
MZP president Lalnunmawia Pautu chuan Zoramin zalenna a puan laia hming ziaktu, signatory 61 zingah 8 chiah an dam tawh a, chu’ng zingah chuan tun tumah hian pakhat chiah a tel thei tih sawiin, “Ram leh hnam tana nunna thapa ke pente hi an tlem telh telh a. Kum tam min dampui tawh kher lo maithei a, an hlu takzet,” a ti. Zalenna sual a nih laia ram leh hnam tana huaisen taka beitu nunna chan ta te leh nungdama la awmte chu eng sawrkar pawhin ngaihsakin chhawmdawl se an duh tih a sawi a ni.
“Kan ram leh hnam tana penchhuakte hian an thiam leh theihna, an finna bakah an nunna an thap a. Kan ngaisang hle a ni. Eng dinhmunah pawh ding se, ram leh hnam tana ke pen tawh an nih avangin kan zah tur a ni,” MZP president hian a ti.
Inkawmnaah hian ICFAI University Mizo Department zirlaite leh Govt. Aizawl West College political science zirlaite leh, college hrang hrang zirlai hruaitute, hnampual zirlai pawl hruaitute bakah MZP member-te an tel a. Zawhna hrang hrang an zawhte chhangin, zalenna sualtute hian thu an sawi a. Eng vanga hnam movement-a tel nge, zalenna an sual hi an inchhir em, tihte zawhna a awm a. Zalenna sualtute kha an thluak suksak an ni em, tia zawhna chu, zalenna suala inpe, nunna chan huama hnam hmangaihna vanga chhuakte kha an thluak suksak an ni lo, tiin an chhang a ni.