ZPM hi beidawng kalkhawm niloin beiseina thar nei kalkhawm kan ni – Dr Vanlalthlana, MLA

ZPM hi beidawng kalkhawm niloin
beiseina thar nei kalkhawm kan ni
– Dr Vanlalthlana, MLA
ZPM party chu mi beidawng kalkhawm niloin beiseina thar nei kalkhawm an ni zawk tih MLA Dr Vanlalthlana chuan a sawi.
Thawhtannia ZPM party office-a inkhawmah Aizawl North-II bialtu MLA Dr Vanlalthlana hi Frontal organisation ten chawimawina thilpek an hlan a. Assembly Session liamtaah private member bill a pulut ve rawih a, session hmasa lamah driver-te hamthatna bill a lo pulut tawh bawk a. An hotute duhsakna avangin heng hun tha a nei thei hi a lawm hle tih a sawi.
“Duhthusam ang chiahin pass ni ta lo mah se, kan hlawhtling hle a; Committee siama enzui tur tala ruahmanna siam a ni ta kha a lawmawm takzet a ni. Keima chaknaa heng thil hi puitlin thei ka ni loa, kan thawhhona avang chauhin heng thil hi kan ti thei a ni,” a ti.
Congress leh MNF in ram tan an theihtawk an lo chhuah tawh a, hmasawnna an lo thlen tawh zawng zawng thlirin, hei aia tha hi a awm thei ang, tih leh, dan pawisak lohna awm thinte chu tun aia tha hian tih theih a ni ang tih an beisei a. A tha zawk beiseitute kalkhawm chuan ZPM hi an siam a ni ber, tiin Dr Vanlalthlana hian a sawi.
“Kalphung thar – thang lo thar zel tur tana belhfakawm ni turin kan inbuatsaih mek a. Tha famkim bik lo mah ila, kan hmahruaitu hian hna min thawhsak zel. Mi beidawng kalkhawm kan ni loa, beiseina thar nei kalkhawm kan ni zawk. ZPM hian chhuan tur kan nei loa, kan chhuan ber chu dikna, rinawmna, Pathian duhzawnga rorelna tundin hi a ni. A thawkrim ber, a taima ber kan nih phawt chuan hei aia ram nuam, kan thlah kal zel tur tan chenna tlakah he ram hi siam kan tum a ni,” a ti.