ZPM-in AMC kaihruai tur siam

Aizawl Municipal Corporation ward 19 awma ward 17 latu ZPM party chuan Thawhlehni khan an hnehna chan lawm pahin AMC kaihruai tur an ruat nghal a. Aizawl mayor thar tur chu Ward No.VI corporator H Lalremtluanga a ni.
ZPM president, chief minister Lalduhoma chuan, mipuiin duh loh an nei a, duh an nei a, an duhthlanna chu vote hmangin an tilang tih a sawi. “Kan tih tum sawi mai turin min beisei a, thil kan sawisela kan sawi chhia a nih pawhin, a kawng tha zawk kawhhmuh tur kan hre tur a ni. Keini chuan heti hian kan ti ang, tih tur hre chuang si loa, mimal nun thlenga tul lo taka thu belhchian dawl loa inbeih hi Aizawl mipuiin an ngaithei lo tih chiang takin a lang,” a ti.
AMC tha zawk an intiamna chuan thil tam tak a keng tel a, hma an lakna tur zawng zawng chu ‘tha zawk’ chhungah hian a khung theih vek dawn tih a sawi. “Mi hi an thikthu a chhia a, a hma amiten thil tha vak lo an lo tih ang kan tih ve chuan an auchhuak dawn a, min bei dawn tih hriatreng tur,” a ti bawk.
AMC-a mawhphurhna la turte puangtu, ZPM adviser K Sapdanga chuan, ZPM chu thawhrimna hmachhuantute an ni a. Thawhrimna kaltlanga mipui leh Pathian malsawmna an chan chu chapopui a thiang loa, an tawngkam, an thusawi, an thiltih an fimkhur deuh deuh a ngai bik tih a sawi.
AMC inthlan chuan Aizawl mipuiin ZPM chunga rinna an nghah zia a tilang nia sawiin, he chakna hi ZPM ta mai ni loin mipui ta a ni tih a sawi. An duhsakna leh rinngamnaah Aizawl mipui chungah lawmthu an sawi tih a sawi a ni.
“Hetiang taka mipuiin kan chunga rinna an nghah avang hian, mipui rinna tih thlawn a thiang lo. Kan thiam bik, thei bik, remhre bik lo a nih pawhin, kan thawkrim bik tal tur a ni ang,” ZPM adviser hian a ti.
Chief minister hoa reform an siamte chu hmuh theihin an ti hlawhting mek zel a. Aizawl mipuiin chu chu an hmuh hmaih loa, seat 19 awma seat 17 hauh theia an thlantlin chhan chu, hna thawk chhunzawm tura an beisei vang a ni tih a sawi. Aizawl mipuiin sawrkar thlakna ngawr ngawrna atan an thlangtling loa, hna thawk thei turin an beisei, tiin corporator tharte a fuih bawk.
UD&PA minister K Sapdanga chuan, tunah chuan AMC leh sawrkar inhnerem takin an kal thei dawn a. AMC tha zawk, mipui tana harsatna siamtu ni lo, Aizawl mipui tana awlsamna leh remchang tha zawk siamtu nih ngei an tum dawn tih a sawi. Hmasawnna hnathawh tur tam tak karah khawpui chhung himna ngaihtuah hmasak a pawimawh nia a hriat thu sawiin, “Ruahtui a tla leh tan tawh a, Aizawl leh a chhehvelah ruahsur nasa vanga leiminin chennain a tih chhiat leh luah tlak loha a siam a tam. Khuarel chhiatna a nih rualin, kan tuiluankawr leh ruah thli luanna mumal nei lo vanga thleng a tam niin mithiamten an sawi. Khawpui chhung hmasawnna kan thawk tak tak hmain khawpui himna hi kan ngaihtuah hmasak a ngaiin ka hria,” a ti.