ZPM-in dan tidanglamin party president-ah CM ni thei dawn

Sawrkar lai party Zoram People’s Movement chuan an dan hman meka party elected office bearers atan chief minister emaw minister dang emaw ni thei lo tura an tih chu tidanglamin, chief minister bik chuan elected OB-a nihna a chelh kawp thei dawn. Thawhlehni khan ZPM Executive Committee thutkhawm vawi 9-na Aizawlah neih a ni a. ZPM Dan bu Article 21-na ‘Nihna leh Mawhphurhna sawifiahna’ point no.1 – “minister leh party elected office bearer nihna chelhkawp theih a ni lo ang” tih chu siam danglamin, chief minister (minister dang tel loin) in party elected OB a chelh kawp thei ang, tia pass a ni.
Kumin August 26-a ZPM Executive Committee thukhawm chuan party elected OB chu Val Upa Council kutah ruat theihna a lo dah sa tawh bawk.
Kumin August thla tawp lam khan ZPM General Headquarters-a hruaitu (adviser, general secretary, secretary leh joint secretary) 12 chuan an party president hnenah an party dan ennawn rawtna ziakin an thehlut a. ‘Kan party constitution-a chief minister leh minister-te elected OB chelh kawp theih loh tih hi, hei chen kan kalpui ta a, kan kalpui tawh dan, party hmakhua leh kal zel tur ngun taka kan thlirin, an nih kawp theih zawk hi party tan a hriselin kan thatpui zawk dawnin kan hria a ni,’ an ti.
Hei vang hian chief minister leh minister-te elected OB chelh kawp theih loh, tih hi paih (delete) nise, tiin an rawt tih an thlen a ni.
Hemi ang hian Thawhlehni khan ZPM Executive Committee hian a ngaihtuah a. Rawtna lut hi siamremin, chief minister tih loh minister dangte chuan elected OB hi chelh kawp loh nise, tiin an rel.
Sawihona hmahruaitu K Sapdanga chuan, ZPM-in leader an nei a, an leader ber party hruaitu nih khapna danpuia an neih chu a tha loa, kawng an hawnsak a tha zawk tih a sawi. Chutih rualin, party office luahlum thei lo hlir dahkhawm chu party tan a tha loa, chuvangin minister dangte kawng hawnsak ve kher a tulna a awm lo, tiin, ZPM sawrkar chu Mizoram mipuiin sawrkar zel turin a beisei a. Chu chu a thlen theihna turin inlungrualna an mamawh tih a sawi a ni.
Chief minister Lalduhoma pawhin thu sawiin, Executive Committee thutkhawm hmasaa rel tawh angin, party hruaitu ruat chu VUC kutah a awm a. Tuna an thurel avang hian, amah chu party president-ah an ruat ngei dawn tihna a ni chuang lo tih a sawi.
“Chief minister leh party president nih kawp hi ka mimal chuan tha ka ti lo. Party rorelna sang berin a rel si chuan, kan koa tlu apiang kan pawm erawh a ngai a; party chhung inlungrualna hi kan chakna thahrui a ni,” a ti.
ZPM elected OB post hi pali a ni a; president, senior vice president, vice president leh treasurer a ni. Val Upa Council-in an ruat tura dah a ni.