ZPM-in mipui an bumkualna hi a rah an la seng dawn – MBJP V/P

ZPM-in mipui an bumkualna hi a
rah an la seng dawn – MBJP V/P
ZPM-in tawngkam thiamna hmanga Zoram mipui an bumkualna chu a rah an la seng dawn tih BJP Mizoram vice president R Vanramchhuanga chuan a sawi.
Thawhtannia an party office-a karthar inhlannaah BJP Mizoram State vice president chuan ZPM leader Pu Lalduhoma’n thudik lo tak hmangin BJP a puh tih a sawi a. ZPM chu lo sawrkar dawn ta se, BJP dotu an nih avangin an do te hnen atang hian engmah an dil hmuh a rinawm loh tih a sawi.
“India President thlannaah kan tribal pui a nih vanga Droupati Murmu-i’n vote a dilna chu hnawlin min vote pui theih loh thu an sawi kha central hian an theihnghilh ngai dawn lo. ZPM hi inhampuar viau mah se, utawk inhampuar ang chauh niin, reilote ah an thep leh nghal mai dawn. Tawngkam thiam avanga Mizoram mipui an bumkualna hi a rah an la seng zawk ngei dawn a ni,” a ti.
Kan Kristianna lem lutuk chuan development-ah min tithuanawp nia a lan thu Vanramchhuanga hian sawiin, “Kristian eiruk pawisa lo, nupui nei reng chunga hmeichhe dang kawp hreh lo political leader, Kohhran Upa ni si eiruk pawisa lo te kan nih nawk avang hian kan Kristianna dinhmun hi pawngsual ang hial niin a lang a. BJP chuan Mizoram leh Mizo hnam leh Kristianna hi ringlomite mithmuhah pawh Pathian hming sawichhiatna remchang an hmuh loh nana siam kan tum a ni,” a ti.
Pu Modi kaihhruai BJP sawrkar chu tha ti viau mah ila, tha kan ti ngam tlat lo niin BJP Mizoram hruaitu hian a sawi a. Buma kan awm loh nan India ram politics thlir chungin, development tha leh dik mipui thleng phak kan neih theih nan Mizoramin BJP sawrkar kan mamawh hle tih a sawi.