ZPM-in neutral rin a kai tawh lo – Lalruatkima

ZPM party chu chhungrilah an buai nasa a, neutral rin an kai tawh lo niin MNF adviser Lalruatkima chuan a sawi.
Tuikual North MNF Unit II-in programme an huaihawt a hmanpuinaah Aizawl West-II bialtu MLA ni bawk Lalruatkima chuan ZPM boruak a kang chho viau a, bial viltu an insiam a, an hniam rawih rawih niin a sawi. “An chhungkuaah an buai tawk ta em em a, neutral rin an kai ta loa, anmahni ngei pawh an inring tawn tawh loa, an bang chum chum a ni,” a ti.
Congress lah an boruak a hniam em em nia sawiin, MNF chu Pathiana innghat party an ni a, Pathianin zilh an ngaih hunah a zilh a, dawmkan an ngaih hunah a dawmkang thin tih sawiin, “Kumin MLA inthlan turah hian MNF sawrkar siam nawn leh turin kan inringtawk,” a ti.
Sawrkar thaa hmuh thin hrang hrang MNF sawrkar hnuaiah hmuh a ni mek tih MNF minister hian a sawi a. Gas kan hnianghnar thu leh veng thenkhatah phei chuan home delivery kalpui tan a nih thu te, ration buhfai a that tak em em thu te, tui leh electric kan neih pangngai tak hle thu te, nasa takin kawngpui a that tak thu leh a chhe lai la awmte pawh siam mek avanga chhia a nih deuh chauh thu te, zirna kawngah hma kan sawn thu leh raltlante thlengin zirna pek an nih thu te, health care leh thalaite hmakhua ngaihtuah kawngah hmalakna chhuanawm tak tak hmuh tur a tam thu te a sawi bawk.
“Hun harsaa min hruaitu Pathian hian he sawrkar hi hun thawl tha zawk, Zoram khawvel thar din tur hian remchanna min pe leh ngei ang tih ka ring a ni,” Lalruatkima hian a ti.