ZPM inthlang tur thlur ngain kal

Sorkarna chang mektu ZPM an inthlang dawn a, thu dawn danin, thlur ngain an kal mek a, mal kal pakhat a awm bawk.
ZPM party hi February ni 15-ah an inthlang dawn a, elected office bearer tur mi pathum leh executive member tur mi 100 an thlang ang. Elected office bearer tur hi mahni hming pe-a chuh lovin floor atangin an thlang dawn a, executive member tur hi chu mahni hming pein an chuh ang – mi 100 thlan turah mi 360 velin hming an pe tawh tih thu dawn a ni.
Elected office bearer tur, president, vice president leh treasurer tur an thlang dawn a, tuna an elected office bearer neih mekah working president leh leader a tel lo.
Elected office bearer thlan turah hian hming pekluha chuh tur a ni lo chungin a ruangam tur a lang deuh ruak a, thlur ngain an kal mek. Amaherawhchu, president atana thlan tur nia lang chu pahnih an awm.
Thu dawn danin, an president ni mek Lalliansawta, W Chhuanawma leh Lalchhuanthanga (MLA) te chu tlar khatah an awm a, anni hi president, vice president leh treasurer atana thlan theih tur an ni.
Tlar dangah VL Zaithanzama (MLA), C Laltanpuia leh SL Ngursailova Sailo te chu president, vice president leh treasurer atana thlan theih turin an awm.
President atana thlan theih tura VL Zaithanzama ringin tlar dang pathum an awm a, vice president atan Er Vanlalneiha leh treasurer atan Saithuama Mangpa te, vice president atan RL Liantluanga leh treasurer atan C Lalchhandami te, vice president atan Lt Col Lalhmingliana (MLA), treasurer atan C Lalthanfela te chu president atana VL Zaithanzama ringin an intlar ve. Vice president atana thlan theih turin Er Lianlunga a mal kal bawk.