ZPM ka zawm ngai dawn lo – Zodintluanga

ZPM ka zawm ngai dawn lo – Zodintluanga
Tunhnaia thlalak thehdarha political party dang zawm anga sawi chu a dik loa, ZPM phei chu a zawm ngai dawn lo tih Congress MLA Zodintluanga chuan a sawi.
Ningania Lungsen North Branch YMA Hall a hawnnaah Thorang bialtu MLA Zodintluanga chuan, MPCC treasurer atanga a ban avangin Congress party a chhuahsan lo tih sawiin, tunhnaia social media-a an thlalak darh vak chu fiamthua an lakpui leh tihdarh a ni, tih a sawi. ZPM leh party dang a zawm loh bakah ZPM a zawm ngai dawn lo tih a sawi a ni.
Lungsen North Branch YMA Hall chu Mizoram hmun dangah pawh a tam lo hle, tiin, he Hall a din theihna’na hmalatute chungah lawmthu a sawi.
“Lungsenah hian Thorang bialtu ka nih atangin hmasawnna tam tak a awm ta hi a lawmawm hle a. Zirna lama kan rualawhna phuhruk niin, Matric Exam Centre leh higher secondary school-te a awm tawh a, tui kan harsatna sukiang tura tanky dah belh ngai kan dahbelh thei te hi a lawmawm hle,” a ti.
An bial chhung khaw kilkhawr ber ber pawh lirthei kawngin a pawh ta vek te chu hmasawnna nasa tak a ni tih Thorang bial MLA hian a sawi bawk.
“He bial atanga MLA ka nih hnu hian Mizoram hmun hrang hrangah hmasawnna hmuh tur a awm nual a, hengte hi Thorang bial mipui tih a ni tih kan pawm thiam a ngai hle. Mizoram tan he bial hian a thawhhlawk hle a ni,” Zodintluanga hian a ti.
YMA Lungsen North Branch hi 1937 September 23-a din tan a ni a, he branch atang hian branch dang pathum a indang tawh a ni.