ZPM sawrkar awm dan a mak – Congress Thalai

ZPM sawrkar awm dan a mak
– Congress Thalai
Manipur-a Zofaten harsatna tawka nunna hial laksak an nih laia ZPM sawrkar a ngai tlat leh harsatna sutkianpui tum lo nia lang chu mak an tih thu Congress Thalai chuan an sawi.
Congress Thalai Hqrs. thuchhuak chuan, thla 19 tehmeuh mipui nunphung buai leh nunna tam tak chan an awm hnuah Manipur sawrkar leh sawrkar laipuiin thlei bik neiin ro a rel nia sawiin, khawvel mithmuhah India ram zahawmna ti bawrhbangah a ngai tih a sawi.
Tunah dik lo takin an himna atana thawktu tlawmngai (village volunteer) te nunna laksak an nih hnuah an ruang pawh vui hleithei loa Manipur sawrkarin buaina a siam zui zel chu enliam mai harsa a tih thu a sawi bawk.
‘Hetiang thil rapthlak leh hun harsa a thlen laia ZPM sawrkarin kan unaute harsatna sutkian pui dan kawng zawng lo leh ngaihtuahna engmah an seng lo hi mak kan ti a. Kan unaute tawrhna hi an tawrhnaah an ngai loa, ramdanga thil thleng satliah ang maia an MLA-ten an sawi ta mai hi Mizoram leh Mizo hnam thendarh tumnaah kan ngai,’ thuchhuah chuan a ti.
Hmun hrang hranga Zofate rilru na taka hliam an ni tih Congress Thalai hian sawiin, Manipur-a Zofa unaute harsatna leh buaina chungchangah an lo intiam tawh ang ngeia hma la turin ZPM sawrkar a phut tih a sawi bawk.