Zu atangin sum lut hnem leh tawh
Kuminah zu atanga sum lut a tam leh tawh a, Mizoram Excise & Narcotics (MEN) department-in zu leh a zuartu an mante atanga sum lut a tam leh tawh fu mai.
MEN department chhinchhiah danin, kuminah March ni 31 thleng khan zu atang hian Rs. 58,18,996.00 an hmu tawh a, thla thum chhunga sum lutah chuan hei hi a tlem lo.
Foreign Liquor & Spirit atangin Rs 42,61,606.00 a lut tawh a, Fines & Confiscation (pawisa chawitir) atangin Rs 15,30,910.00, other receipt atangin Rs. 26,480.00 a lut tawh.
2019-ah Mizoram sorkarin zu a khap a, zu atanga sum hmuh a tlem nghal; cheng vaibelchhe 54 chuangin zu atanga sum hmuh hi kum hmasa aiin a tlem nghal.
MEN department-in an chhinchhiah danin, 2019-ah khan zu atangin Rs 1568,38,489.00 an hmu a, hei hi a hma kum 2018-a an hmuh aiin Rs 5460,93,028.00-in a tlem.
2019-ah hian May ni 28 thleng zu hi zawrh a la ni a, a zuarte’n court-ah Mizoram sorkar an khin avangin, court thuin lakluh sate chu May ni 28 thleng zawrh a ni. Hei vang hian kum khat chhunga zu atanga sum hmuh hi a la tam viau zawk nia ngaih a ni.
2020-ah a tla thla duai a, mahse kum tin a pung leh tho. kum liam ta 2022-ah khan Rs 2,29,84,481 a lut a, hei hi 2020 hnua a tam ber kum a ni. Kuminah thla thum chhunga sum lut zat hi, zu khap hnu kum hmasa lam kum tluana sum lut zat nena khaikhinin a tlem lo.
-- Advertisement --
Zu atanga MEN department sum hmuh dan
2014-ah Rs 297,58,204
2015-ah Rs 4414,99,275
2016-ah Rs 7286,52,621
2017-ah Rs 6499,93,043
2018-ah Rs 7029,31,517
2019-ah Rs 1568,38,489
2020-ah Rs 104,68,159
2021-ah Rs 120,90,458
2022-ah Rs 2,29,84,481
2023-ah Rs. 58,18,996
(March thleng)