Zu in lo thei lote dinhmun ngaihtuah ngam a tul ta – Excise minister

Zu in lo thei lote dinhmun
ngaihtuah ngam a tul ta
– Excise minister
Mizoramah zu in mi an thi nasa a, a in lo thei lo te dinhmun chu huaisen taka ngaihtuah ngak a tul ta nia a lan thu Excise & Narcotics minister Lalnghinglova Hmar chuan a sawi.
Thawhtannia ZPM office-a inkhawmah minister Lalnghinglova Hmar chuan, politician ang ni loin mimal rilru a sawi tia sawi hmasa in, zu in lo thei lote in tur zu chhe lutuk hian ngaihtuahna thar min pe se a duh tih a sawi a. “Tunhnaiah Mizoramah zu in mi an thi nasa hle a, a in lo thei lote dinhmun hi huaisen taka ngaihtuah ngam a tul tawh niin a lang,” a ti.
Hetihlai hian sawrkarin zu leh ruihhlo lakah beihpui an thlak zel a. Vaivakawn ram huanchhunga ‘a senchi lane’ tih chu ‘venbuk lane’ tia thlakin khawtlang nen tangruala zu hmunpui tihrem a ni tawh tih sawiin, “Hei hian sawrkar hmalakna thawhpuiho thei khawtlang hruaitu neih pawimawh zia a tilangin ka hria. Village council leh local council inthlanah pawh sawrkar nena hmasawnna bawm zawn ho thei tur mipuiin vote ang u,” a ti.
Chief minister-in kumin January 14-a a hawn tak, Empowering Mizoram Sports hnuaiah kum 8-15 inkar tan sports lama bul tanna thingtlang khaw thleng phakin an duang tih Sports minister Lalnghinglova Hmar hian a sawi a. National Games-a Mizoram thlen chin enin sports-a kan sum sen leh kan thlen chin a inmil lo fo tih sawiin, “Infiammite leh a enkawltu association-te hmasawnna tak tak tura insawrbing turin sports-ah kalphung kan ti thar zel dawn. Tuipuiral leh Tuichangral Games lamah talent hai chhuak turin bul tan a ni a, contact sports leh Olympic 2036-a Mizote tel theihna tur lam hawiin kan kal dawn,” a ti.