21st Century Pop star ropui ber- Beyonce

21st Century Pop star ropui ber- Beyonce
Billboard magazine chuan kum zabi 21-naa pop star ropui zual an thlante list an tichhuak kim ta a, rin lawk ang ngeiin Beyonce chu No.1 a ni. Billboard hian November thla tir atang khan kum zabi 21-naa pop star ropui zual an thlan chhuah 25 te chu a tah tawl te tein an hming an tichhuak a, kar liamta khan Taylor Swift chu pop star ropui ber dawttu a nih thu an lo puang tawh a, nimin khan Beyonce chu pop star ropui berah an puang leh ta a ni. He list hi Billboard editorial staff ten thlirna tlang hrang hrang atanga an thlir hnua an siam a ni.
Beyonce hi rimawi khawvelah kum 25 zet a lo tal ve tawh a, March ni 18, 2000 khan kum zabi 21-naa a vawi khat nan Billboard Hot 100 (singles) chart-ah No.1 a kai a, hemi tum hian quartet Destiny’s Child anga chart No.1 hi kai a ni a, 1999 khan Destiny’s Child hian he chart-a No.1 kai thei hi an lo nei tawh nain, kum zabi 21-naa pop star ropui ber thlanna a nih miau avangin 2000 chin chauh lak a ni a, 2000 hnuah Beyonce hian Hot 100 chart-a No.1 kai thei hla 12 a nei tling tawh a, a tharlam ber chu kumina a hla hit ‘Texas old ‘Em’ tih kha a ni.
Billboard magazine pawhin Beyonce leh Taylor Swift-ah hian tunge ropui zawk tihah inhnialna a tam tur zia an hre lawk a, Swift hi No.2 a nih thu an puan pawhin Swift fans lungawi lo ten he list hi an tawng let nasa hle. Mahse, Billboard chuan tunlaiah Swift hi tu an tluk rual loha ropui ni mah se pop khawvela a inhman chhung hi a la rei lo em a, Beyonce te pop music-a kum 25 chuang lo tal tawh chuan hniak an lo ngah tawh nge nge a, Swift hi pop khawvela a la tal rei tawk loh vang deuh chauh a No.1 ni ta lo anga ngaih theih turin Billboard chuan an tarlang.
Beyonce hian ‘Say My Name’ hla Hot 100-a No.1 a kai pui khan tleirawl (teenager) chauh a la ni a, a manager-ah a pa a la hmang nghe nghe a ni. Tunah a hla he chart-a No.1 thar ber ‘Texas Hold ‘Em’ a No.1 leh hi chuan fa pathum nei tawhin, kum 42 a tling tawh a, No.1 a neih hmasak ber leh a thar ber inkar kum 24 chhung hian han flop ve deuh lai pawh a nei chuang miah lo a, han pilbo deuh vang vang lai pawh a nei chuang lo.
Beyonce hian Destiny’s Child leh solo artist angin Billboard Hot 100-a No.1 kai thei hla 12 nei tawhin, Billboard 200 (albums) chart-a No.1 kai thei album pariat a nei tawh a, Grammy Award-ah pawh nomination 99 nei tawhin, award 32 a dawng tawh a, Grammy history-ah zaithiam nomination ngah ber leh award dawng hnem ber a la ni.
Kum zabi 21-naa Billboard Greatest Pop Star te chu:
1. Beyoncé
2. Taylor Swift
3. Rihanna
4. Drake
5. Lady Gaga
6. Britney Spears
7. Kanye West
8. Justin Bieber
9. Ariana Grande
10. Adele
11. Usher
12. Eminem
13. Nicki Minaj
14. Justin Timberlake
15. Miley Cyrus
16. Jay-Z
17. Shakira
18. The Weeknd
19. BTS
20. Bruno Mars
21. Lil Wayne
22. One Direction
23. Bad Bunny
24. Ed Sheeran
25. Katy Perry