German-in Leopard tank khap tum lo
Germany Foreign Minister Anna Baerbock chuan Poland-in Ukraine hnenah Leopard-2 tank a thawn lut duh a nih chuan ‘a dang dawn lo’ tiin a sawi.
Ukraine chuan khawthlang ram te chu German siam tank hi pe tura ngenin Russia an hneh theihna tura ralthuam pawimawh a ni, a ti.
Ukraine Foreign Minister Dmytro Kuleba chuan a hma pawhin Germany chuan ‘Ukrainian sipai nunna tam tak a chhanhim thei’ tiin a lo sawi tawh bawk.
Poland-in German siam a neih Leopold-2 tank te hi Ukraine hnenah pek duh mah se Germany remtihna a lak phawt a ngai a. Pathianni khan Baerbock chuan Poland chuan phalna dilna a la theh lut lo a ti.
“Tun dinhmunah chuan min la dil tlat lo va, min dil a nih phawt chuan kan dang hauh lovang,” tiin France LCI TV hnenah a sawi.
Poland Prime Minister Mateusz Morawiecki chuan sorkar chuan Berlin atangin phalna lak an tum tur thu sawiin mahse Berlin-in phalna pe lo mah se Poland chuan Ukraine hnenah tank te hi a pe tho ang a ti bawk.
“An remtihna kan nei thei lo a nih pawhin kan tank te hi ram dang te nen Ukraine hnenah kan pe tho ang,” tiin Morawiecki chuan a sawi.
European Union’s foreign policy chief, Josep Borrell chuan Germany chuan EU ram dang tena Leopard tank Ukraine hnena an pek a dang dawn lo tiin a sawi bawk a. Ukraine thlawp dan tur sawihona neih chu tank chungchangah ringawt a ni tur a ni lo, a ti bawk.
Ukraine’s Dmytro Kuleba chuan Leopard 2 tank nei ram te chu rang taka official-a German sorkar hnena heng tang te Ukraine hnena pek remtihna dil turin a lo ngen tawh a.
“Heng tank te hian danglamna an siam vek thei a. Tuna kan mamawh leh thil pawimawh ber a ni” tiin a sawi. Kuleba chuan Germany pawhin tank te chu a pek gnei a rintlat thu sawiin, “British Challenger pawh kan dawng der tawh a, a hma chuan thil theih loh min tihsak a. A tawpah chuan kan duh angin thil a kal zel a. Tunah pawh kan neih ngei ka ring,” tiin a sawi.
German sorkar thupuangtu chuan Leopard 2 tank Ukraine hnena pek remtihna dilna an la dawng lo a ti a. Kar kalta khan Poland PM Morawiecki chuan an ram chuan Leopard 2 tank 14 chu Kyiv hnenah pek a inpeih reng thu a lo sawi tawh bawk.
Polish president’d foreign policy adviser, Marcin Przydacz chuan Baerbock thusawi chu lawmawm a tih thu sawiin chutih rual chuan Germany Chancellor Olaf Scholz ka atanga chhuak ngei ni se a duhthu a sawi thung.
“Inbiakna leh diplomatic lama hmalakna kaltlangin Poland chuan German dinna a thlak danglam thei a ni,” tiin Przydacz chuan a sawi.
Mahse, Poland chuan Berlin leh Nato allies te chu an Leopards te thawn lut ve turin a duh thung a. Tank 14 vel lek chuan Ukraine fighting capacity ah danglamna a siam phak loh a hlau a ni.
Leopard 2 tank te hi a bik takin Russian T-90 tanks te Russia-in Ukraine run nana a hman ber hmachhawn tura duan a ni a. Khawvel hmun tinah 2,000 vel awm anga ngaih a ni a, Ukraine President Volodymyr Zelensky chuan Leopard-2 tank 300 vel nei se chuan Russia an hneh theih tur thu a sawi.
Ram hrang hrangte chuan Germany-in Leopard 2 tank Ukraine a thawnluh a hrehna chu an tei thei lo hle a. Regulation awm mek hnuaiah a remtihna la lova ram danga he tank hi pe an awm chuan Germany chuan a leitir tawh dawn lo a ni.
Kar kalta Zirtawpni khan allied ram 50 intelkhawm te inhmuhkhawm neih a ni a, tank chungchangah thutlukna siam thei lovin Germany pawhin ngawih a la chuh tlat a, mahse, Ukraine hnena tank pek luh dala an puhna chu a hnawl thung.
Inrinni khan Estonia, Latvia leh Lithuania foreign minister te chuan thuchhuah intawm siamin Germany chu ‘Ukraine hnenah Leopard tank pe nghal se’ an ti a ni.
Scholz chu Russia-Ukraine buainaah fimkhur taka chet la niin Russia atanga buaina nasa zawk awm thei duh lo a ni a. Kartawp lam khan French President Emmanuel Macron nen pawh an inhmu a.
France chuan Ukraine hnenah light tank a thawn lut tawh a, Macron chuan Leclerc heavy tank pawh an pek mai theih thu a sawi bawk. Ram dangte pawhin Ukraine hnena tank thawn luh an remti a. UK pawhin Challenger 2s tank 14 a thawn lut dawn a ni.
Leopard 2 tank te hi world class weapon niin a nei ram an awm nual a. Ukraine chuan Russian forces te laka inven nana a mamawh ngawih ngawihah a ngai a ni. Leopard tank tam ber hi Europe-ah vek a awm a, lo lakhawm duh ta se lakkhawm a awlsam a, chumai bakah siam that ngai pawh ni se awlsam zawkin siam that mai theih a ni bawk. Germany hian a hmain Ukraine hnenah air defence system IRIS-T leh Patriot surface-to-air missiles leh armoured personal vehicles te a lo pe tawh bawk.