Turkey-in Sweden Nato member nih remti lo
Sweden chuan Nato member nih a tumnaah Turkey thlawpna a hmuh inring lo law law rawh se, tiin Turkish president Tayyip Erdogan chuan Stockholm a lungawilohna lantirnaa Quran hal a nih hnuah a sawi.
Sweden chuan, Russia-in Ukraine a run hnuah Nato zawm a dil a, mahse, member a nih theih nan Turkey remtihna a mamawh ngei ngei a ni.
Sweden-a Kurdish protester te chuan tun thla tir lama lungawilohna an lantirah Erdogan lem siamchawp an lo hal tawh a, Quran an hal leh zui a ni.
“Kan ram embassy hmaa pungkhawm te mawi lo taka chet dan hian dilna an siam chungchangah kan lak atanga hriatthiamna an mamawh lo,” tiin Erdogan chuan a sawi.
Erdogan chuan tuna lungawilohna lantirna thar ber Danish party a far-right politician te kalpui chu sawiselin blasphemy a ti a, free speech tia sawi theih a ni lo a ti bawk.
Sweden sorkar pawhin he lungawilohna lantirna kalpui dan hi a sawisel ve tho bawk a. “Sweden hian freedom of expression huam zau takin a kalpui a, mahse, chu chuan an lungawilohna lantir dan chu Swedish sorkar, keima mimal emaw ngaihdan a ni tihna a ni lo,” tiin Swedish Foreign Minister Tobias Billstrom chuan a sawi.
Erdogan thu sawi chungchangah hian Billstrom chuan a ngaihdan a sawi hmain Turkish leader thusawi chiang taka hriatfiah hmasak phawt a duh thu a sawi a.
“Sweden chuan Nato membership chungchangah Sweden, Finland leh Turkey tena kan siam chu kan zah a ni,” tiin a sawi.
Sweden leh Finland te chuan Russia-in Ukraine a run hnuah Nato zawm an dil a, mahse, tun hnaia Turkey sorkar laka lungawilohna lantirna chuan boruak a tisosang hle thung.
Nato secretary general Jens Stoltenberg chuan freedom of expression chu Nato ramah chuan ‘Commodity hlu tak a ni’ tia sawiin lungawilote chet dan chu awm ang lo viau pawh ni se ‘dan kalh a ni nghal ngawt lo’ tiin a sawi thung.
Muslim ram Turkey chuan Swedish sorkarin Kurdish tena lungawilohna an lantir a remti chu ‘pawm theih loh’ tiin a lo sawi tawh a. “Tute mahin mithianghlim te ti mualpho turin rights an nei lo” tiin Erdogan chuan a sawi a.
“Thil kan sawi tawh chuan dik takin kan sawi thin a, miten zahna min lantir loh chuan an awmnaah kan dah kir leh mai,” tiin a sawi bawk.
Defence Minister Hulusi Akar chuan Turkey chuan Swedish defence minister Pal Johnson an Ankara tlawh a tumna pawh Sweden in Kurdish tena lungawilohna an lantir tihtawp lama hma an lakna a awm lo tiin a thulhtir phah tawh bawk.
Turkey hi Nato member ni sa a ni a, a duh chuan member nih tum ram a lo dang chat thei a, Sweden in Nato member a nih theih nan demand hrang hrang tihhlawhtlin tur a lo siam tawh a, chung zingah chuan Kurds thenkhatte Sweden-a awm mek Turkey a thawn luh te pawh a tel.
Tun thla tir lam khan Swedish prime minister chuan Kurdish protester tena Stockholm-a Turkey president lim an hal chu Sweden in Nato member nih a tumna tihbahlah tumna tiin a sawi.
Swedish minister chuan lungawilote chet dan chu ‘hmuhsitawm’ a ti a, mahse, Turkey chuan an demna chu a la tawk lo a tihsak thung.