An party a sawrkar chuan sawrkar hnathawkte tan Old Pension Scheme kalpui tum a nih bakah hlawh leh dearness allowance a hun taka pek a nih tur thu Congress president Lalsawta chuan a sawi.
-- Advertisement --
“Kum tam tak kan lo hman tawh, Old Pension Scheme hi state dang thenkhat angin keini pawhin hman leh kan tum. Finance minister ka lo nih tawhna atangin a theih a ni tih ka chian,” tiin Lalsawta hian thuthar thehdarhtute a kawmnaah a sawi.
Congress sawrkar laiin sawrkar hnathawkte duhsakin an hlawh chungchangah 6th Pay Commission Recommendation chu ‘adapt’ mai loin a nihna ang angin an pawm a. Kum khata vawihnih an DA pung pawh notification an chhuah angin sawrkar remchan dan angin an pe tih a sawi. An sawrkar chuan hei hi an chhunzawm leh dawn tih sawiin, “Sawrkar hnathawkte DA hi a hun takah kan pe ang. Hlawh leh pension leh GP Fund hi sawrkar hnathawkten a hun takah an hmu thei ang. Supreme Court phei chuan a huna pek an nih loh chuan a interest nen an pe tur a ni, a ti hial a. Pensioner-te tan pawh dearness pay hi a hun takah kan pe anga, sawrkar hnathawkte hlawh a hun takah kan pe ang,” a ti.
Regular-a thawk mekte leh provisional employee-te tangkai zawka hman an nih theihna’n an dinhmun ennawn a ni anga, dinhmun tha zawkah an dah ang tih Congress president hian a sawi. “Manpower Policy leh Manpower Management mumal tak siam kan duh a, an ni hi kan ram rohlu ni lehzual tur leh kan ram leh a mipui tan rohlu dinchhuak tura kan hmanrua an ni,” a ti.
Sawrkar sum enkawl dan fel loh vangin leiba a tam tih Finance minister hlui Lalsawta hian sawiin, “Leiba a tam em vang hian sawrkar leh tur tan rulh ngai a tam dawn hle. Hei hi sawrkar sum a nih angin dik taka hman loh vang leh Planning Commission awm tak loh hnua India ram sum enkawl dan danglam ta hriat fuh loh vang niin ka hria. Sawrkar sum hi mimal sum enkawl anga enkawl theih a ni,” a ti.
Inthlan ti hautak lo tur leh candidate-te insenso vak vak chu Congress party chuan tih loh an tum tih Congress president hian a sawi a. Zawhna chhangin, hetah hian an party candidate te an khuahkhirh theih a ring tih a sawi. “Mi hausate chauh tana politics kawng inhawng nia ngaih theih ta hian rilru a ti na a, hei hi thlak theih a nih ka ring tlat,” a ti.